ރާއްޖޭގެ ބޭރު ފައިސާއާ ބެހޭ ގާނޫނަށް ސަރުކާރުން ހުށަހަޅާފައިވާ މުހިންމު އިސްލާހުތައް ދިރާސާކުރުމުގެ މަސައްކަތް، ރައްޔިތުންގެ މަޖިލީހުގެ މާލިއްޔަތު ކޮމިޓީން ކުރިއަށް އޮތް އާދީއްތަ ދުވަހުގެ ނިޔަލަށް ނިންމުމަށް މިއަދު ފާސްކޮށްފިއެވެ.
ހޮޅުދޫ ދާއިރާގެ މެންބަރު އަބްދުއްސައްތާރު މުހައްމަދު ސަރުކާރުގެ ފަރާތުން މި ބިލު މަޖިލީހަށް ތައާރަފުކުރެއްވީ އިއްޔެއެވެ. ބިލު ދިރާސާކުރުމަށް މާލިއްޔަތު ކޮމިޓީއަށް ފޮނުވުމާ އެކު، އާންމުންގެ ހިޔާލު ހޯދުމަށް މިއަދު ހެނދުނު 11:30 އާ ހަމައަށް ވަނީ ފުރުސަތު ހުޅުވާލާފައެވެ. ފުރަތަމަ ކަނޑައަޅާފައި އޮތީ މިއަދުގެ ނިޔަލަށް ކޮމިޓީ މަރުހަލާ ނިންމުމަށެވެ. ނަމަވެސް، މިއަދު ބޭއްވި ކޮމިޓީ ބައްދަލުވުމުގައި މެންބަރުން ވަނީ މި މަސައްކަތް އޯގަސްޓު މަހުގެ 18ވަނަ ދުވަހަށް ދަންމާލުމަށް ނިންމަވައި، އެ ދުވަހުގެ ހެނދުނު 10:30ގައި އިތުރު ބައްދަލުވުމެއް ބޭއްވުމަށް ތާވަލުކޮށްފައެވެ.
މި ބިލުގައި އިގްތިސާދަށް ބޮޑެތި ބަދަލުތަކެއް ގެނުވާނެ ކަންކަން ވަނީ ހިމަނާފައެވެ. އޭގެ ތެރޭގައި، ފަތުރުވެރިކަމުގެ ސިނާއަތުން ލިބޭ ބޭރު ފައިސާ މާރުކުރުމުގެ އުސޫލަށް ގެންނަ ބަދަލު ފާހަގަކޮށްލެވެއެވެ. މިހާރު އޮންނަ ގޮތުން ފަތުރުވެރިއެއްގެ ބޮލަކަށް 500 ޑޮލަރު ނުވަތަ ޖުމްލަ އާމްދަނީގެ 20 އިންސައްތަ މާރުކުރުމުގެ އިހުތިޔާރު ލިބޭއިރު، އަލަށް ގެންނަ އިސްލާހާއެކު ލާޒިމުވާނީ ހަމައެކަނި އާމްދަނީގެ 20 އިންސައްތަ މާރުކުރުމަށެވެ. މީގެ އިތުރުން، ފަތުރުވެރިކަން ފިޔަވައި އެހެނިހެން ދާއިރާތަކުން ބޭރު ފައިސާ ހޯދާ ކުންފުނިތަކުގެ ތެރެއިން ފައިސާ މާރުކުރަން މަޖުބޫރުވާ މިންގަނޑު ވަނީ އަހަރަކު 25 މިލިއަން ޑޮލަރުގެ އާމްދަނީއަކަށް މަތިކޮށްފައެވެ. (މިހާރު އޮންނަ ގޮތުން ނަމަ މިއަދަދަކީ 20 މިލިއަން ޑޮލަރެވެ).
ބޭރު ފައިސާއިން މުއާމަލާތްކުރާ ހުރިހާ ވިޔަފާރިތަކަކަށް އަމާޒުކޮށް ހުށަހަޅާފައިވާ އެންމެ ފާހަގަކޮށްލެވޭ އެއް ބަދަލަކީ، ލިބޭ އާމްދަނީ ދިވެހިރާއްޖޭގައި ހިންގާ ބޭންކެއްގައި ހުޅުވާފައިވާ އެކައުންޓަކަށް ޖަމާކުރުން މަޖުބޫރުކުރުމެވެ. އަދި އެ އެކައުންޓްތަކުގެ ތަފުސީލުތައް މޯލްޑިވްސް މަނިޓަރީ އޮތޯރިޓީ (އެމްއެމްއޭ)އަށް އެންގުމަށް ވެސް ވަނީ ޝަރުތުކޮށްފައެވެ. މި ގާނޫނު ފާސްވާތާ 30 ދުވަހުގެ ތެރޭގައި ކަމާގުޅޭ ގަވާއިދުތައް ހަދައި، އެއަށް އަމަލުކުރަން ފެށުމަށްޓަކައި އެމްއެމްއޭއިން އިންތިގާލީ މުއްދަތެއް ދޭންޖެހޭނެކަމަށް ބިލުގައި ބަޔާންކޮށްފައިވެއެވެ.