ދިވެހި ފުލުހުންނާއި މޯލްޑިވްސް އިމިގްރޭޝަން ގުޅިގެން އިއްޔެ މާލޭގައި ހިންގި ޚާއްޞަ ހަރަކާތެއްގައި 426 ބިދޭސީއަކު ބަލައިފާސްކޮށް، ޤަވައިދާ ޚިލާފަށް އުޅެމުންދިޔަ 13 މީހަކު އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.
މާލެ ސަރަޙައްދުގައި ބިދޭސީން ނަފާ ހޯދުމަށް ހިންގާ ވިޔަފާރިތަކަށް ޚާއްޞަކޮށްގެން ޓާސްކްފޯސްއަކުން ކުރިއަށްގެންދިޔަ މި ރެއިޑްތަކަކީ، ރާއްޖޭގެ އިމިގްރޭޝަން ޤާނޫނާ ޚިލާފަށް އުޅޭ ފަރާތްތައް ހޯދުމަށް ފަށާފައިވާ ފުޅާ އޮޕަރޭޝަންގެ ބައެކެވެ. އިމިގްރޭޝަނުން ހާމަކޮށްފައިވާ ގޮތުގައި އިއްޔެގެ އޮޕަރޭޝަނުގައި އަތުލައިގަތް 13 މީހުންނަކީ ވެސް ރާއްޖޭގައި ހުރުމުގެ ހުއްދަ ނެތި އުޅެމުންދިޔަ ބައެކެވެ.
މި މައްސަލައަށް ދާއިމީ ފަރުވާއެއް ހޯދުމުގެ ގޮތުން ސަރުކާރުން ހިންގާ “އޮޕަރޭޝަން ކުރަނގި”ގެ ތެރެއިން މިހާތަނަށް ދެލައްކަ ދެހާހަށްވުރެ ގިނަ ބިދޭސީ މަސައްކަތްތެރިންގެ މަޢުލޫމާތު ވަނީ ރެކޯޑުކުރެވިފައެވެ. އަދި އަންނަ މީލާދީ އަހަރު ފެށުމާ އެކު، ޤާނޫނާ ޚިލާފަށް އުޅޭ އެއްވެސް ބިދޭސީއަކަށް ދެވަނަ ފުރުޞަތެއް ނުދީ ވަގުތުން އަނބުރާ ޤައުމަށް ފޮނުވާލެވޭނެކަމުގެ އިންޒާރު ކަމާބެހޭ ފަރާތްތަކުން ވަނީ ދީފައެވެ.
ކުރިއަށް އޮތް ހަ މަސްދުވަހަށް ދެމިގެންދާ ގޮތަށް ރާވާފައިވާ މި މަސައްކަތުގެ ތިންވަނަ ފިޔަވަހި އަމާޒުކޮށްފައި ވަނީ، ފިލައިގެން އުޅޭކަމަށް ރިޕޯޓުކޮށްފައިވާ 2،895 މީހަކު ހޯދައި ޑީޕޯޓުކުރުމަށެވެ. މީގެ އިތުރުން ވޯކް ޕާމިޓް އަދި ވިސާ ނެތި އުޅޭ މީހުންނާއި، ޤަވާއިދާ ޚިލާފަށް ވިޔަފާރިކުރާ ބިދޭސީން ހޯދައި ފިޔަވަޅު އެޅުމަކީ ވެސް މި ފޭސްގެ މުހިންމު ބައެކެވެ.
މި ހަރުކަށި ފިޔަވަޅުތަކާ އެކު ވެސް، ދިވެހި ވިޔަފާރިވެރިންނަށް ލުއިގޮތްތަކެއް ހަމަޖައްސައިދިނުމަށް ސަރުކާރުން ވަނީ ނިންމާފައެވެ. އެގޮތުން، ބިދޭސީން ގެންގުޅޭ ފަރާތްތަކުން ދައްކަންޖެހޭ ވޯކް ޕާމިޓް ފީ މުއްދަތު ހަމަވުމުގެ ކުރިން ދެއްކުމަށް ބާރުއެޅުމާއި، ފީ ނުދެއްކި ހުރި ފަރާތްތަކަށް ފަސޭހައިން އެ ފައިސާ ދެއްކޭނެ އިންތިޒާމުތައް ވަނީ ހަމަޖައްސާފައެވެ. ސަރުކާރުން ގަބޫލުކުރާ ގޮތުގައި މިއީ ބިދޭސީން ގެންގުޅޭ ދިވެހިން ޤަވާއިދުގެ ތެރެއަށް ވަނުމަށް ލިބިގެންދާނެ ބޮޑު ހިތްވަރެކެވެ.