ދިވެހިރާއްޖޭގެ ޕްރޮސިކިއުޓަރ ޖެނެރަލް އައްބާސް ޝަރީފާއި ރަޝިއާގެ ޕްރޮސިކިއުޓަރ ޖެނެރަލް އެލެގްޒެންޑަރ ގުޓްސާން ބައްދަލުކުރައްވައި، ދެ ޤައުމުގެ މެދުގައި ޤާނޫނީ ގުޅުން ބަދަހިކުރުމުގެ މުހިންމު އެއްބަސްވުމެއްގައި ސޮއިކުރައްވައިފިއެވެ.
ޝަންހާއީ ކޯޕަރޭޝަން އޯގަނައިޒޭޝަން (އެސްސީއޯ)ގެ މެންބަރު ޤައުމުތަކުގެ ޕްރޮސިކިއުޓަރ ޖެނެރަލުންގެ 24ވަނަ ބައްދަލުވުމުގައި ބައިވެރިވެވަޑައިގަތުމަށް ރަޝިއާގެ ކަޒާންއަށް ކުރައްވަމުންގެންދަވާ ރަސްމީ ދަތުރުފުޅުގެ ތެރެއިން، މި އެއްބަސްވުމުގެ މައިގަނޑު މަޤުޞަދަކީ ދެ ޤައުމުގެ ޕްރޮސިކިއުޓަރ ޖެނެރަލްގެ އޮފީހުގެ މެދުގައި ފަންނީ މައުލޫމާތާއި ތަޖުރިބާ ޙިއްޞާކުރުމެވެ. އެގޮތުން، މުވައްޒަފުން ތަމްރީނުކުރުމާއި، ގުޅިގެން ޢިލްމީ ދިރާސާތައް ކުރުމުގެ އިތުރުން، ދެ ފަރާތުން ކަނޑައަޅާ ވަކި ދާއިރާތަކަކުން އެކިކަހަލަ އެހީތެރިކަން ފޯރުކޮށްދިނުމަށް ވަނީ ހަމަޖެހިފައެވެ. ޚާއްޞަކޮށް، ޤައުމުތަކުގެ ބޯޑަރު ހުރަސްކޮށް ހިންގާ ބޮޑެތި ކުށްތައް ހުއްޓުވުމުގައި ދެ އޮފީހުން ގުޅިގެން މަސައްކަތްކުރުމަށް މި އެއްބަސްވުމުގެ ސަބަބުން ވަރަށް ބޮޑަށް މަގުފަހިވެގެންދާނެ ކަމަށް ޕީޖީ އޮފީހުން މަޢުލޫމާތުދެއެވެ.
އެސްސީއޯގެ ބައްދަލުވުމުގެ ހަވާސާގައި ކުރިއަށްދިޔަ މި ރަސްމީ މަޝްވަރާތަކުގައި، ރާއްޖޭގެ ޕީޖީ އޮފީހުގެ މަސައްކަތްތައް ހަރުދަނާކޮށް އަވަސްކުރުމަށްޓަކައި ފަށާފައިވާ “ޕީޖީއޯ 2.0″އާ ގުޅޭ މަޢުލޫމާތު ޕީޖީ އައްބާސް ވަނީ ރަޝިއާގެ ވަފުދާ ޙިއްޞާކުރައްވާފައެވެ. މި ޕްރޮގްރާމުގެ އަމާޒަކީ އޮފީހުގެ މަސައްކަތުގެ ދުވެލި 60 އިންސައްތައަށް ވުރެ ހަލުވިކުރުންކަން ފާހަގަކުރައްވައި، ޕީޖީ ވިދާޅުވީ ޓެކްނޮލޮޖީގެ އެހީގައި މަސައްކަތްތައް އަވަސްކުރެވުނު ނަމަވެސް، ކަންކަމުގައި އެންމެ ފަހުގެ ނިންމުންތައް ނިންމުމުގެ ބާރު އޮންނާނީ އިންސާނުންގެ އަތްމަތީގައި ކަމަށެވެ.
މި ތާރީޚީ އެއްބަސްވުމުގައި ސޮއިކުރެއްވުމަށް ފަހު، މި ދަތުރުފުޅުގައި ރަޝިއާގެ ސަރުކާރުންނާއި ޚާއްޞަކޮށް އެ ޤައުމުގެ ޕްރޮސިކިއުޓަރ ޖެނެރަލްގެ ފަރާތްޕުޅުން އަދާކުރެއްވި ފުރިހަމަ މެހެމާންދާރީއަށް ޕީޖީ އައްބާސް ވަނީ ނުހަނު ބޮޑަށް ޝުކުރު އަދާކުރައްވާފައެވެ. އަދި މި ފަހުމުނާމާގެ ދަށުން ކުރިއަށް އޮތް ތާނގައި ދެ ޤައުމުގެ ޤާނޫނީ ނިޒާމުގެ ތެރެއިން ގުޅުން އިތުރަށް ބަދަހިވެ، އައު ދާއިރާތަކުން ގުޅިގެން މަސައްކަތްކުރުމަށް ފުރުޞަތު ހުޅުވިގެންދާނެ ކަމަށް އުންމީދުކުރައްވާ ކަމަށް ވެސް އެމަނިކުފާނު ވިދާޅުވިއެވެ.