މިއަހަރުގެ ޤައުމީ ދުވަސް ކުލަގަދަކޮށް ފާހަގަކުރުމަށް ސަރުކާރުން ރާވާފައިވާ ރަސްމީ ހަރަކާތްތަކުގައި ބައިވެރިވެވަޑައިގަތުމުގެ ބޭނުންފުޅުގައި، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުއާއި އެމަނިކުފާނުގެ އަނބިކަނބަލުން ސާޖިދާ މުޙައްމަދު ތާރީޚީ ބަޠަލް ބޮޑުތަކުރުފާނުގެ އުފަންރަށް ކަމަށްވާ ހއ. އުތީމަށް މިއަދު ވަޑައިގަތުމާ އެކު އެރަށުގެ ރައްޔިތުން ވަރަށް ހޫނު މަރުޙަބާއެއް ކިޔައިފިއެވެ.
މިއަދު ހެނދުނު 10:00ގައި ފެށުމަށް ހަމަޖެހިފައިވާ ޤައުމީ ދުވަހުގެ ޚާއްޞަ ޖަލްސާގައި، ޤައުމީ އިނާމު ދެއްވުން އޮންނާނެއެވެ. މިގޮތުން، ތިން ފަރުދަކަށާއި ޖަމުޢިއްޔާއަކަށް ޝަރަފުވެރިކަމުގެ އިނާމު އަދި ހަތް ބޭފުޅަކަށާއި ކުންފުންޏަކަށް ހިތްވަރު ދިނުމުގެ އިނާމު ރައީސް ޑރ. މުޢިއްޒު ޙަވާލުކުރައްވާނެއެވެ. މީގެ އިތުރުން ވެސް، ޤައުމީ ޚިދުމަތުގެ އިނާމު އެއް ބޭފުޅެއްގެ ހަނދާނަށް އެރުވުމަށް ސަރުކާރުން ވަނީ ކަނޑައަޅުއްވާފައެވެ.
ރައީސުލްޖުމްހޫރިއްޔާގެ މި ޒިޔާރަތުގެ ތެރެއިން، އުތީމުގައި އަލަށް ބިނާކޮށްފައިވާ “ބޮޑުތަކުރުފާނުގެ ހަނދާނީ ދޮރާށި” ރަސްމީކޮށް ހުޅުވައިދެއްވުމަށް ވަނީ ހަމަޖެހިފައެވެ. ހަމައެއާ އެކު، ޤައުމީ އަބްޠާލުންގެ ޖިހާދުގެ ތާރީޚު ރަމްޒުކޮށްދޭ ޚާއްޞަ ވާހަކަ ވައު ވެސް އެމަނިކުފާނު ހުޅުއްވައިދެއްވާނެއެވެ.
ޤައުމީ ދުވަސް ފާހަގަކުރުމަށް އުތީމުގައި ހިންގާ ހަރަކާތްތައް އިއްޔެ ހެނދުނު ދިދަ ނެގުމުގެ ރަސްމިއްޔާތަކާ އެކު ފަށާފައިވާއިރު، ރޭގަނޑު ވަނީ ކުލަގަދަ ހަވާއެރުވުމުގެ ހަރަކާތެއް ވެސް ކުރިއަށް ގެންގޮސްފައެވެ. ދިވެހިރާއްޖޭގައި ޤައުމީ ދުވަސް ނިސްބަތްކުރެވެނީ، ޕޯޗުގީޒުންގެ އިސްތިޢުމާރީ އަޅުވެތިކަމުން މިލޮބުވެތި ވަޠަން ސަލާމަތްކޮށްދެއްވި އައްސުލްޠާނުލްޣާޒީ މުޙައްމަދު ތަކުރުފާނުލް އަޢުޡަމްގެ މަތިވެރި ޤައުމީ ޖިހާދަށެވެ. އެ ބަޠަލުގެ މަތިވެރި ޒިކުރާ އާކުރުމުގެ ގޮތުން ކޮންމެ އަހަރެއްގެ ރަބީޢުލްއައްވަލް މަހުގެ ފުރަތަމަ ދުވަސް ފާހަގަކުރަނީ ރާއްޖޭގެ ޤައުމީ ދުވަހުގެ ގޮތުގައެވެ.