މަދަނީ ޖަމުޢިއްޔާ ޓްރާންސްޕޭރަންސީ މޯލްޑިވްސްގެ ބޭންކު އެކައުންޓުތައް ފްރީޒްކުރުމަށް ސިވިލް ކޯޓުން މިއަދު އަމުރުކޮށްފިއެވެ.
މި ފިޔަވަޅު އަޅާފައި ވަނީ، އެ ޖަމުޢިއްޔާގެ ކުރީގެ މުވައްޒަފެއް ކަމަށްވާ ޢަލީ ޝަރީފަށް މުސާރައާއި ޢިނާޔަތްތަކުގެ ގޮތުގައި ދޭންޖެހޭ ތިންލައްކަ ފަންސާސް ހަހާހަށްވުރެ ގިނަ ރުފިޔާ ދެއްކުމަށް ކޯޓުން ދިން ތިން ދުވަހުގެ މުހުލަތުގައި އެކަން ކޮށްފައި ނުވާތީއެވެ. ޝަރީފްގެ ފަރާތުން މި މަހުގެ 5ވަނަ ދުވަހު ހުށަހެޅި މައްސަލައަކާ ގުޅިގެން ނެރުނު މި އަމުރުގައި، އެކައުންޓުތައް ހިފަހައްޓައިގެން ކޯޓު މެދުވެރިކޮށް އެ ފައިސާ ނަގައިދިނުމަށް ވަނީ ކަނޑައަޅާފައެވެ.
މައްސަލައިގެ އަސްލަކީ، ޝަރީފަށް އެހެން ވަޒީފާއެއް ލިބުމާ ގުޅިގެން ޓްރާންސްޕޭރަންސީގެ މެނޭޖްމަންޓުން އޭނާއާމެދު ތަފާތުކުރުންތަކެއް ގެންގުޅެ، މަޖުބޫރުން ވަޒީފާއިން ވަކިވާން ޖެހުނުކަމަށް ބުނެ ވަޒީފާއާ ބެހޭ ޓްރައިބިއުނަލަށް ހުށަހެޅި ޝަކުވާއެކެވެ. އެ މައްސަލަ ބެލުމަށް ފަހު، އޭނާ ވަކިކޮށްފައި ވަނީ ގަވާއިދާ ޚިލާފަށްކަމަށް ކަނޑައަޅައި، އަލުން ވަޒީފާ ދިނުމާ އެކު ގެއްލުނު މުސާރައިގެ ގޮތުގައި 356,932 ރުފިޔާ ދިނުމަށް ޓްރައިބިއުނަލުން އެންގިއެވެ.
ޓްރައިބިއުނަލްގެ އެ ނިންމުން ބާތިލުކުރުމަށް ޓްރާންސްޕޭރަންސީން ދިވެހިރާއްޖޭގެ ހައިކޯޓުގައި އިސްތިއުނާފު ކުރިނަމަވެސް، އެ ކޯޓުން ވެސް ނިންމީ ޓްރައިބިއުނަލްގެ ހުކުމް ރަނގަޅު ކަމަށެވެ. މިއަދު ސިވިލް ކޯޓުން ނެރުނު އަމުރާ ގުޅިގެން ޝަރީފްގެ ގާނޫނީ ޓީމުން ބުނެފައި ވަނީ، މިއީ އިންސާފު ހޯދުމަށް ކުރަމުންދާ މަސައްކަތަށް ލިބިގެންދިޔަ ވަރަށް ބޮޑު ކުރިއެރުމެއް ކަމަށެވެ.