ޚިދުމަތް އިތުރަށް ޒަމާނީކޮށް ހަރުދަނާކުރުމުގެ މަޤުޞަދުގައި، ސަރުކާރުގެ ފަރާތުން “މާލެ ޓެކްސީ”ގެ ނަމުގައި ފަރުމާކޮށްފައިވާ ޚާއްޞަ މޯބައިލް އެޕްލިކޭޝަން ރަސްމީކޮށް ތަޢާރަފުކޮށް އާންމުކޮށް ބޭނުންކުރަން ފަށައިފިއެވެ.
ކުރިން ވެބްސައިޓެއް މެދުވެރިކޮށް ފޯރުކޮށްދެމުންދިޔަ މި ޚިދުމަތް ފުރިހަމަ މޯބައިލް އެޕަކަށް ބަދަލުކުރުމާ އެކު، ވަގުތުން ޓެކްސީއަށް އެދުމުގެ އިތުރުން ކުރިއާލާ ދަތުރުތައް ރޭވުމުގެ ފުރުޞަތު ކަސްޓަމަރުންނަށް މިހާރު ލިބޭނެއެވެ. މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ހާމަކުރައްވާފައިވާ ގޮތުގައި، އައު އެޕްލިކޭޝަން މެދުވެރިކޮށް އެންމެ މަދުވެގެން ތިން ގަޑިއިރު ކުރިން ދަތުރުތައް ޝެޑިއުލް ކުރެވޭނެ ނިޒާމު ވަނީ ޤާއިމުކޮށްފައެވެ. އަދި ތާވަލުކުރެވިފައިވާ ދަތުރުތަކާއި ކުރިން ކޮށްފައިވާ ދަތުރުތަކުގެ ތަފްޞީލީ މަޢުލޫމާތު ވެސް ފަސޭހަކަމާ އެކު ފެންނަން ހުންނާނެއެވެ.
މި އެޕްލިކޭޝަނަކީ ކަސްޓަމަރުންގެ ރައްކާތެރިކަމާއި ލުއިފަސޭހަކަމަށް ބޮޑު އިސްކަމެއް ދީގެން ތަރައްޤީކޮށްފައިވާ މަންސައެކެވެ. އެގޮތުން، ދަތުރުގެ އަގު އަދާކުރުމަށް އެޕްގެ ވޮލެޓަށް ފައިސާ އަޅައިގެންނާއި، ބޭންކް ކާޑުގެ ޚިދުމަތް އަދި ސްކޭންކޮށްގެން ފައިސާ ދެއްކޭނެ އިންތިޒާމުތައް ވަނީ ހިމަނާފައެވެ. އަދި ހަމައެހެންމެ، ކުއްލި ނުރައްކަލުގެ ޙާލަތްތަކުގައި ބޭނުންކުރާނެ އިމަޖެންސީ ފީޗަރއަކާއި، ޑްރައިވަރާ ފަސޭހައިން ގުޅައި ނުވަތަ މެސެޖުކުރެވޭނެ ގޮތްތަކުގެ އިތުރުން، އުޅަނދުގައި އެއްޗެއް ބޭއްވިއްޖެނަމަ އެކަން ރިޕޯޓުކޮށްދިނުމުގެ އިންތިޒާމު ވެސް މީގައި އެކުލެވިގެންވެއެވެ.