ޑައުން ސިންޑްރޮމް ހުންނަ ކުއްޖަކަށް ފަސް ސްކޫލަކުން ފުރުސަތު ނުދިނުމުން ކުއްޖާގެ މަންމަ އެ މައްސަަލަ ރައީސް ޑރ. މުހައްމަދު މުއިއްޒުއާ ހިއްސާކުރައްވައިފިއެވެ.
މިހަފްތާގެ ރައްޔިތުންގެ އަޑު ޕްރޮގްރާމްގައި ބައިވެރިވި ފާތިމަތު ފައިރޫޒާ އާދަމް ވަނީ ޑައުން ސިންޑްރޮމް ހުރުމުން ދަރިފުޅާމެދު ތަފާތު ކުރުންތައް ގެންގުޅޭތީ އެކަން ރައީސްގެ ސަމާލުކަމަށް ގެންނަވައިފައެވެ.
އެގޮތުން ދަރިފުޅު އެންމެ ކުޑައިރުވެސް ތަޢުލީމް ހާސިލްކުރަން ބޭނުންވި ސްކޫލުން ފުރުސަތު ނުލިބުމާއެކު ޖުމްލަ ފަސް ސްކޫލުން ފުރުސަތު ނުލިބުނުކަން އޭނާ ފާހަގަކުރިއެވެ.
އޭގެ އިތުރުން ވެސް އެކި ތަފާތު ކުރުންތައް ކުރިމަތިވާކަން ވެސް އޭނާ ފާހަގަ ކުރިއެވެ.
ފައިރޫޒާގެ ވާހަކަ އަޑު އައްސަވައި ރައީސް ވިދާޅުވީ އެ ކަންކަން ބައްލަވާނެ ކަމަށެވެ.
ވީއެންމެ ރަނގަޅަކަށް ވީއެންމެ އަވަހަކަށް އެ ކަންކަމުގައި ވަކި ކުއްޖަކަށް ނޫން، މުޅި މުޖުމަޢުއަށް ފައިދާވާނެ ގޮތަކަށް ކަންކަން ފަހިވާން އަޅުގަނޑު ބޭނުމީ”ރައީސް ވިދާޅުވިއެވެ.
ޑައުންސިންޑްރޮމްއަކީ އިންސާނާގެ ޖީންއެއްގައި އިތުރަށް އެއް ކްރޮމޮސޯމް ހުރުމުގެ ސަބަބުން ދިމާވާ ސިއްހީ ހާލަތެކެވެ. އެފަދަ ކުދިން ރާއްޖޭގައި ފަހަކަށް އައިސް އިތުރުވެ އެ ކުދިންނަށް ހާއްސަ އެސޯސިއޭޝަންއެއްވެސް މިހާރު ހުރެއެވެ.