އިދިކޮޅު އެންމެ ބޮޑު ސިޔާސީ ޕާޓީ ކަމަށްވާ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ކޮންގްރެސް އަންނަ ސެޕްޓެމްބަރު މަހުގެ 19ވަނަ ދުވަހު ބޭއްވުމަށް އެ ޕާޓީގެ ގައުމީ މަޖިލީހުން ރޭ ފާސްކޮށްފިއެވެ.
އެމްޑީޕީގެ ގައުމީ މަޖިލީހުގެ ހަތަރުވަނަ ދައުރުގެ 36ވަނަ ބައްދަލުވުމުގައި މި ތާރީހު ކަނޑައެޅުމަށް ހުށަހެޅުއްވީ ޕާޓީގެ ޗެއާޕާސަން އަދި ކުރީގެ ރައީސުލްޖުމްހޫރިއްޔާ މުހައްމަދު ނަޝީދެވެ. މި ހުށަހެޅުމަށް ފުޅާދާއިރާއެއްގައި ބަހުސްކުރުމަށް ފަހު ނެގި ވޯޓުގައި ބައިވެރިވެވަޑައިގެންނެވި 63 މެމްބަރުންގެ ތެރެއިން 52 މެމްބަރުން ވަނީ މި ތާރީހުގައި ކޮންގްރެސް ބޭއްވުމަށް ތާއީދުކުރައްވައި ވޯޓު ދެއްވާފައެވެ.
މި ނިންމުމާ ގުޅިގެން ވާހަކަފުޅު ދައްކަވަމުން ރައީސް ނަޝީދު ވަނީ، ކަނޑައެޅިފައިވާ ތާރީހުގައި ކޮންގްރެސް ކުރިއަށްގެންދިއުމަށް ކުރަންޖެހޭ އެންމެހާ މަސައްކަތްތައް ޕާޓީން ކުރާނެ ކަމުގެ ޔަގީންކަން ދެއްވާފައެވެ. އަދި ކޮންގްރެސްގެ ކަންކަން ރާވާފައިވާ ގޮތުގެ ތަފްސީލުތައް ކުރިއަށް އޮތް ތަނުގައި ހާމަކުރައްވާނެ ކަމަށާއި، ކޮންގްރެސްއަށް ފަހު ގައުމީ މަޖިލީހުގެ މިހާރުގެ ދައުރު ހަމަވުމުގެ ކުރިން އެ މަޖިލީހުގެ އިންތިހާބު ވެސް ބާއްވާނެކަން އެމަނިކުފާނު ހާމަކުރެއްވިއެވެ.
އާންމު އުސޫލެއްގެ ގޮތުން ކޮންމެ ފަސް އަހަރަކުން އެއްފަހަރު އެމްޑީޕީގެ ކޮންގްރެސް ބޭއްވި ނަމަވެސް، ގައުމީ މަޖިލީހުގެ ރުހުމާ އެކު ހާއްސަ ޝަރުތުތަކެއް ފުރިހަމަވާނަމަ އާދަޔާ ހިލާފު ކޮންގްރެސްއެއް ބޭއްވުމުގެ ފުރުސަތު ޕާޓީގެ އަސާސީ ގަވާއިދު ތަނަވަސްކޮށްދެއެވެ. މިދިޔަ ޖޫން މަހުގެ 1 ވަނަ ދުވަހު ޗެއާޕާސަންގެ މަގާމާ ހަވާލުވެވަޑައިގަތުމަށް ފަހު ރައީސް ނަޝީދު ވަނީ ޕާޓީގެ ހިންގާ ގަވާއިދަށް ބަދަލުތަކެއް ގެންނަވާނެކަން އިއުލާންކުރައްވާފައެވެ.
އެމްޑީޕީގެ ކޮންގްރެސް އަންނަ މަހު ބޭއްވުމަށް ތައްޔާރުވަމުންދާއިރު، ސަރުކާރު ހިންގާ ކޮންގްރެސް ޕާޓީން ވެސް ދަނީ އަންނަ ސެޕްޓެމްބަރު މަހުގެ 15 އިން 18 އަށް އެ ޕާޓީގެ ގައުމީ މަޖިލިސް ބޭއްވުމަށްޓަކައި މަސައްކަތްތަކެއް ކުރަމުންނެވެ.