ސާކް އެގްރިކަލްޗަރ ސެންޓަރުގެ ބެލުމުގެ ދަށުން ސަރަޙައްދީ ފެންވަރެއްގައި މަސްވެރިކަން މޮނިޓަރކޮށް ބެލެހެއްޓުމަށްޓަކައި ޚާއްޞަ ޕްލެޓްފޯމެއް ޤާއިމުކުރުމަށް ސާކްގެ މެމްބަރު ޤައުމުތަކުން އެއްބަސްވެއްޖެއެވެ.
މި މުހިންމު ނިންމުން ނިންމާފައި ވަނީ، ވިޔަފާރީގެ ގޮތުން އަގުބޮޑު ކަނޑުމަހުގެ ބާވަތްތައް ރައްކާތެރިކަމާ އެކު ބެލެހެއްޓުމަށްޓަކައި ސާކް ޤައުމުތަކުގެ ގުޅުން ބަދަހިކުރުމަށް ބޭއްވި ޚާއްޞަ ބައްދަލުވުމެއްގެ ތެރެއިންނެވެ. މި މަހާސިންތާ ރަސްމީކޮށް ފައްޓަވައިދެއްވީ ދިވެހިރާއްޖޭގެ ފިޝަރީޒް، އެގްރިކަލްޗަރ އެންޑް އޯޝަން ރިސޯސަސް މިނިސްޓްރީގެ ސްޓޭޓް މިނިސްޓަރ އަލްފާޟިލް މުޙައްމަދު މުއްޠަލިބެވެ.
މި ބައްދަލުވުމުގެ މަޝްވަރާތައް މައިގަނޑު ގޮތެއްގައި އަމާޒުކޮށްފައި ވަނީ، އެކަށީގެންވާ މިންވަރަށްވުރެ އިތުރަށް މަސްވެރިކަން ކުރުން (އޯވަރފިޝިންގ)އާއި، ޤަވާއިދާ ޚިލާފަށް ސިއްރުން ކުރާ (އައި.ޔޫ.ޔޫ) މަސްވެރިކަން ހުއްޓުވުމަށެވެ. މީގެ އިތުރުން، މޫސުމީ ބަދަލުތަކާއި ކަނޑުގެ ދިރުންތަކުގެ ވެށި ހަލާކުވުން ފަދަ ބޮޑެތި މައްސަލަތަކުން އަރައިގަތުމަށް ގުޅިފައިވާ ސަރަޙައްދީ ޕްލޭނެއް އެކުލަވާލުމާމެދު ފުޅާ ދާއިރާއެއްގައި ޚިޔާލު ބަދަލުކުރެވިފައިވެއެވެ.
ހަމައެއާ އެކު، މަސްވެރިކަމުގެ ސިނާޢަތް ދެމެހެއްޓުމާއި، ކަނޑުމަހުން ތައްޔާރުކުރާ އުފެއްދުންތަކުގެ އަގު އުފުލައި ބައިނަލްއަޤްވާމީ ބާޒާރުތަކަށް ވަނުމުގެ ފުރުޞަތުތައް ފަހިކުރުމަށް ވެސް ބައިވެރިން މަޝްވަރާކުރެއްވިއެވެ. ކާބޯތަކެތީގެ ރައްކާތެރިކަން ކަށަވަރުކުރުމާއި، މި ދާއިރާގައި އަންހެނުންގެ ޙިއްޞާ އިތުރުކޮށް ބާރުވެރިކުރުވުމަކީ ވެސް މި ފޯރަމްގައި އިސްކަންދިން މައުޟޫޢުތަކެކެވެ.
ސަރަޙައްދީ ފެންވަރުގައި މަސްވެރިކަން ބެލެހެއްޓުމަށް ޤައުމުތައް ގުޅިގެން މަސައްކަތްކުރުމުގެ މުހިންމުކަން ފާހަގަކޮށް، މި ބައްދަލުވުމުގައި ވަނީ ޤައުމުތަކަށް ޚާއްޞަ އެކްޝަން ޕްލޭންތަކެއް ތައްޔާރުކުރުމަށް ނިންމާފައެވެ. އަދި ވިޔަފާރީގެ ނަފާ ލިބޭ ކަނޑުމަހުގެ ބާވަތްތަކަށް އަމާޒުކޮށްގެން، ސްޓްރެޓީޖިކް ލަފާތަކާއި ހުރަސްތައް ބަޔާންކުރާ ފުރިހަމަ ރިޕޯޓެއް އެކުލަވާލުމުގެ މަސައްކަތް ފެށުމަށް ވެސް ވަނީ އެއްބަސްވެފައެވެ. އެންމެހައި ބައިވެރިންގެ އިއްތިފާޤުން، ސާކް އެގްރިކަލްޗަރ ސެންޓަރުގެ ވިލަރެސްކުރުމާ އެކު އައު ޕްލެޓްފޯމް އުފެއްދުމަށް ނިންމީ މި މަޤްޞަދުތައް ޙާޞިލުކުރުމަށެވެ.