ފަންނާއި ސަގާފަތާއި ތަރިކައާ ބެހޭ ވުޒާރާއާއި އެ އިދާރާގެ ދަށުން ހިނގަމުންދާ މުއައްސަސާތައް އިޝްތިހާރުކޮށް، އާންމުންނާ އޮންނަ ގުޅުން ބަދަހިކުރުމުގެ ގޮތުން، ދެ އަހަރު ދުވަހުގެ މުއްދަތަށް އެ ތަނުގެ ޕަބްލިކް ރިލޭޝަންސް (ޕީއާރް) ބަލަހައްޓައިދޭނެ ފަރާތެއް ހޯދަން އިއުލާނުކޮށްފިއެވެ.
މި މަސައްކަތަށް ޝައުގުވެރިކަން ހުރި ފަރާތްތަކުން މި ހިނގާ މަހުގެ 14ވަނަ ދުވަހުގެ ހެނދުނު 11:30ގެ ކުރިން އަންދާސީހިސާބު ހުށަހެޅުމަށް އެ ވުޒާރާއިން ވަނީ އެދިފައެވެ. ކޮންޓްރެކްޓް ކާމިޔާބުކުރާ ފަރާތަކުން މައި ވުޒާރާގެ އިތުރުން، އޭގެ ދަށުން ހިންގާ ހަތް އިދާރާއެއްގެ މީޑިއާ ކެމްޕޭންތަކާއި އެކިއެކި މަޝްރޫއުތަކުގެ ޕްރޮމޯޝަނަލް މަސައްކަތްތައް ވެސް ކުރިއަށްގެންދަން ޖެހޭނެއެވެ.
މި އިއުލާނާ ގުޅިގެން ވުޒާރާއިން މައުލޫމާތު ދީފައިވާ ގޮތުގައި، ޕީއާރް ކުންފުންޏާ ހަވާލުކުރެވޭ މައިގަނޑު މަސްއޫލިއްޔަތަކީ ވުޒާރާގެ ތަސައްވުރު އިތުރަށް ފުރިހަމަކޮށް، ކުރިއަށްގެންދާ ޕްރޮޖެކްޓްތަކުގެ މައުލޫމާތު ފުޅާ ދާއިރާއެއްގައި އާންމުންނާ ހަމައަށް ފޯރުކޮށްދިނުމެވެ. މިއީ ސަގާފީ އަދި ތަރިކައިގެ މަސައްކަތްތަކަށް އާންމުންގެ މެދުގައި ހޭލުންތެރިކަން އިތުރުކުރުމަށް އެ ވުޒާރާއިން ނިންމި މުހިންމު ނިންމުމެކެވެ.