ދުނިޔޭގެ ބާޒާރުގައި ތެލުގެ އަގުތައް އުފުލުމާ ގުޅިގެން ރައްޔިތުންނަށް އަންނަ މާލީ ބުރަ ކުޑަކުރުމަށްޓަކައި، މި އަހަރު ސަރުކާރުން ސަބްސިޑީގެ ގޮތުގައި 2.3 ބިލިއަން ރުފިޔާ ޚަރަދުކޮށްފިއެވެ.
ފިނޭންސް މިނިސްޓްރީން އެންމެ ފަހުން އާންމުކޮށްފައިވާ ދައުލަތުގެ މާލީ ތަފާސްހިސާބުތައް ދައްކާގޮތުގައި، މި އަދަދަކީ ފާއިތުވި އަހަރުގެ މި މުއްދަތާ އަޅައިބަލާއިރު 68.9 އިންސައްތައިގެ ބޮޑު އިތުރުވުމެކެވެ. ކުރީ އަހަރުގެ ޖޫން މަހުގެ 4ވަނަ ދުވަހާ ހަމައަށް ސަބްސިޑީއަށް ހޭދަކޮށްފައިވަނީ 1.36 ބިލިއަން ރުފިޔާއެވެ. އެހެންކަމުން މިއަހަރުގެ މިހާތަނަށް ސަބްސިޑީއަށް ވަނީ އިތުރަށް 938.3 މިލިއަން ރުފިޔާ ހޭދަކޮށްފައެވެ.
މިފަދަ ބޮޑު ހޭދައެއް ކުރަންޖެހުނު މައިގަނޑު ސަބަބަކީ ބައިނަލްއަގުވާމީ މާކެޓުގައި ތެޔޮ އަގުބޮޑުވި ނަމަވެސް، އެކަމުގެ ނޭދެވޭ އަސަރު އާންމު ފަރުދުންނާއި ވިޔަފާރިތަކަށް ފޯރިޔަނުދީ ހިފެހެއްޓުމަށް ސަރުކާރުން ނިންމި ނިންމުމެވެ. ރާއްޖެއަކީ ބޭރުން އެތެރެކުރާ މުދަލަށް ބަރޯސާވާ ގައުމަކަށް ވުމާ އެކު، ތެލުގެ އަގަށް އަންނަ ކޮންމެ ބަދަލެއް ކަރަންޓުގެ ޚިދުމަތަށާއި، ދަތުރުފަތުރުގެ ނިޒާމަށާއި، އާންމު މުދަލުގެ އަގުތަކަށް ވަގުތުން ކުރެއެވެ.
ތަފާސްހިސާބުތަކުން އެނގޭ ގޮތުގައި، މުޅި މިއަހަރަށް ސަބްސިޑީ ދިނުމަށް ދައުލަތުގެ ބަޖެޓުގައި ކަނޑައަޅާފައި ވަނީ 2.89 ބިލިއަން ރުފިޔާއެވެ. ނަމަވެސް އަހަރުގެ މެދުތެރެއާ ހަމައަށް އައިއިރު، މީގެ ތެރެއިން 79.6 އިންސައްތަ (2.30 ބިލިއަން ރުފިޔާ) ވަނީ ބޭނުންކުރެވިފައެވެ. ހަމައެއާ އެކު، ސަބްސިޑީގެ އިތުރުން އެކި ފަރާތްތަކަށް ދެވޭ އެހީއާއި ކޮންޓްރިބިއުޝަންތައް ހިމެނޭހެން ޖުމްލަ 5.69 ބިލިއަން ރުފިޔާ ވަނީ ޚަރަދުކޮށްފައެވެ. ފާއިތުވި އަހަރު މި އަދަދު ހުރީ 4.07 ބިލިއަން ރުފިޔާގައެވެ. މިއީ 39.8 އިންސައްތަ ނުވަތަ 1.62 ބިލިއަން ރުފިޔާގެ އިތުރުވުމެކެވެ.
މީގެ އިތުރުން، ދައުލަތުގެ އާންމު ހިންގުމުގެ ޚަރަދު (ރިކަރަންޓް އެކްސްޕެންޑިޗަރ) ވެސް ވަނީ މަތިވެފައެވެ. ކުރީ އަހަރު 14.47 ބިލިއަން ރުފިޔާ ހޭދަވި ނަމަވެސް، މިއަހަރު އެ އަދަދު ވަނީ 16.87 ބިލިއަން ރުފިޔާއަށް އަރާފައެވެ. މިއީ 2.41 ބިލިއަން ރުފިޔާ ނުވަތަ 16.6 އިންސައްތައިގެ ކުރިއެރުމެކެވެ. މާލީ ތަޖުރިބާކާރުން ފާހަގަކުރާ ގޮތުގައި، ދައުލަތުގެ ޚަރަދުތައް މިހާބޮޑަށް އުފުލިފައިމި ވަނީ، އިގްތިސާދީ ގޮތުން ދިމާވާ ގޮންޖެހުންތަކާ އެކު ވެސް، އަސާސީ ޚިދުމަތްތައް މެދުނުކެނޑި ފޯރުކޮށްދިނުމަށް ސަރުކާރުން އަމިއްލައަށް މާލީ ބުރަ އުފުލަމުންދާތީއެވެ.