ކުރީގެ ރައީސް ޢަބްދުﷲ ޔާމީން ކުރައްވަމުން ގެންދަވާ ތުހުމަތުތަކަށް ރައްދުދެއްވައި، ސަރުކާރުގެ ތިން ވުޒާރާއެއް ހިންގަމުން އައި އިމާރާތުގައި އަލިފާން ރޯވާން މެދުވެރިވީ ކަރަންޓު ނަރުތަކެއްގެ ސަބަބުންކަން ތަޙުޤީޤަށް ސާބިތުވެފައިވާކަމަށް ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާ ބެހޭ ވަޒީރު ޢަލީ އިޙްސާން ޢަލީ އިޙްސާން ހާމަކުރައްވައިފިއެވެ.
ރާއްޖޭގެ ފުލުހުންނާއި ބޭރުގެ ކަމާ ބެހޭ ތަޖުރިބާކާރުން ގުޅިގެން ހިންގި ތަފްޞީލީ ތަޙުޤީޤުން މި ހާދިސާގައި އެއްވެސް ޖިނާއީ ޢަމަލެއް އެކުލެވިގެންނުވާކަން ކަށަވަރުވެފައިވާކަމަށް ވަޒީރު ވިދާޅުވިއެވެ. ނަމަވެސް، ފާއިތުވި ހޮނިހިރު ދުވަހު ރައީސް ޔާމީން ވަނީ، އެ އިމާރާތުގައި ގަސްތުގައި އަލިފާން ރޯކޮށްލީކަމަށާއި އަދި އެ ޢަމަލު ހިންގި ފަރާތް ފުލުހުންނަށް ވަރަށް ރަނގަޅަށް އެނގޭނެކަމަށް ވިދާޅުވެ، މުތުލަޤުކޮށް ބޮޑެތި ތުހުމަތުތަކެއް ކުރައްވާފައެވެ.
މިކަމާ ގުޅިގެން ވަޒީރު އިޙްސާން ސޯޝަލް މީޑިއާގައި ޙިއްސާކުރެއްވި ޕޯސްޓެއްގައި ވިދާޅުވީ، ރައީސް ޔާމީންގެ އަތްޕުޅުގައި ހުރި މަޢުލޫމާތުތައް ސާފުކުރުމަށް ފުލުހުންގެ މުއައްސަސާއަށް މިހާރު އަންގަވާފައިވާނެ ކަމަށެވެ. އޭގެ އިތުރުން، ދިވެހި ފުލުހުންގެ މައްޗަށް އެމަނިކުފާނު ކުރެއްވި ސީރިއަސް ތުހުމަތުތަކުގެ މައްސަލަ ވަކިން ތަޙުޤީޤުކޮށްދިނުމަށް އެދި ނޭޝަނަލް އިންޓެގްރިޓީ ކޮމިޝަން (އެންއައިސީ)އަށް ވެސް ހުށަހަޅުއްވާފައިވާކަން ވަޒީރު ފާހަގަކުރެއްވިއެވެ.
ސަރުކާރުގެ 3 ވުޒާރާއެއް ހިންގަމުންދިޔަ އިމާރާތްތައް އަންދައިގެން ގޮސްފައިވާ މައްސަލައާ ގުޅިގެން ދިވެހި ފުލުހުންނާއި އެކުވެރި ޤައުމުތަކުގެ މިފަދަ ކަންކަން ތަހުޤީގުކުރާ މާހިރުން ގުޅިގެން ކުރި ތަހުގީގުން ހޯދިފައިވަނީ އެ ހާދިސާ ހިނގާފައިވަނީ ކަރަންޓު ނަރުތަކުގައި ރޯވެގެންކަމަށާއި…
— Minister of Homeland Security, Labour & Technology (@min_mohst) September 6, 2026
2024ވަނަ އަހަރުގެ ޑިސެމްބަރު މަހުގެ 12ވަނަ ދުވަހު ހިނގި މި ނުރައްކާތެރި އަލިފާނުގެ ހާދިސާގައި ބޭނުންނުކުރެވޭ ވަރަށް އަނދައިގެން ގޮސްފައި ވަނީ ގެދޮރުވެރިކަމާބެހޭ ވުޒާރާއާއި، ޢުމްރާނީ ތަރައްޤީއާބެހޭ ވުޒާރާގެ އިތުރުން ތިމާވެއްޓާ ބެހޭ ވުޒާރާ ހިންގަމުން އައި ޢިމާރާތެވެ. ހަމައެހެންމެ، އެ ސަރަޙައްދުގައި ހުރި މާލެ ސިޓީ ކައުންސިލްގެ ބަޔަކަށް ވެސް މި ހާދިސާގައި ބޮޑެތި ގެއްލުންތަކެއް ލިބިފައިވެއެވެ.