ދިވެހިރާއްޖެއަށް އިސްލާމްދީނުގެ މަތިވެރި ނިއުމަތް ލިބުނުތާ 900 އަހަރު ފުރޭ ތާރީހީ މުނާސަބަތު ފާހަގަކުރުމުގެ ގޮތުން، ގައުމުގެ އިސްލާމީ ވަހުދަތާއި ތަރިކަ ދެމެހެއްޓުމުގެ މަތިވެރި މަގުސަދުގައި މުޅި އަހަރަށް ބަހާލައިގެން މާލެއާއި އަތޮޅުތެރޭގައި ހާއްސަ ހަރަކާތްތަކެއް ހިންގުމަށް ފަންނާއި ސަގާފަތާއި ތަރިކައާ ބެހޭ ވުޒާރާއިން ނިންމައިފިއެވެ.
ދައުލަތުގެ މީޑިއާއަށް މައުލޫމާތު ދެއްވަމުން ތަރިކައާ ބެހޭ ވުޒާރާގެ ނައިބު އާމިނަތު އިބްރާހީމް ވިދާޅުވި ގޮތުގައި، މި ފަހްރުވެރި މުނާސަބަތާ ގުޅުވައިގެން ޖުމްލަ 15 ވަރަކަށް ހަރަކާތް ވަނީ ރާވާފައެވެ. އެންމެ ފާހަގަކޮށްލެވޭ އެއް ކަމެއްގެ ގޮތުގައި، ދިވެހިން އިސްލާމްވި ހާދިސާ ރަމްޒުކޮށްދޭ ދާއިމީ ހާއްސަ ބިނާއެއް މާލެ ސަރަހައްދުގައި ގާއިމުކުރުމުގެ މަސައްކަތް ފެށުން ހިމެނެއެވެ. މީގެ އިތުރުން ހުރިހާ އުމުރުފުރާއަކާ ގުޅޭގޮތަށް ފަރުމާކޮށްފައިވާ މި ހަރަކާތްތައް މާލެއެކޭ އެއްފަދައިން ރަށްރަށުގައި ވެސް ކުރިއަށް ގެންދާނެކަން އޭނާ ކަށަވަރުކޮށްދެއްވިއެވެ.
މި އަހަރުގެ ތެރޭގައި ހިންގުމަށް ކަނޑައަޅާފައިވާ މައިގަނޑު ކަންތައްތަކުގެ ތެރޭގައި ބައިނަލްއަގްވާމީ ފެންވަރުގެ އިސްލާމީ ޓްރޭޑް ފެއާއެއް ބޭއްވުމާއި، ގައުމީ ގުރުއާން ފެސްޓިވަލެއްގެ އިތުރުން ދީނީ މައުލޫމާތު މުއްސަނދިކޮށްދޭ ކުއިޒު މުބާރާތެއް ހިމެނެއެވެ. ހަމައެހެންމެ، ކުޅިވަރުގެ ތެރެއިން އެކުވެރިކަން އާލާކުރުމަށް “އިސްލާމީ ސޮލިޑާރިޓީ ގޭމްސް”އާއި، ހުސްނުހައްތުގެ ފެސްޓިވަލެއްގެ އިތުރަށް ދީނީ އަދި ތާރީހީ ފިލްމުތައް ދައްކައިދޭ ފެސްޓިވަލެއް ވެސް ވަނީ ތާވަލުކުރެވިފައެވެ. އަދި އަންނަން އޮތް ޖީލުތައް ދީނީ ގޮތުން ތަރުބިއްޔަތުކޮށް ރިވެތި އަހުލާގު އަށަގެންނެވުމަށްޓަކައި ޒުވާނުންނަށް އަމާޒުކޮށްގެން އިސްލާމީ ތަރިކައިގެ ކޭމްޕެއް ބޭއްވުމަށް ވެސް ވަނީ ނިންމާފައެވެ.
މީގެ އިތުރުން ވެސް، ރާއްޖޭގެ އިސްލާމީ ތާރީހު ދައްކުވައިދޭ މިއުޒިއަމް ގެލެރީއެއް ހެދުމާއި، އިސްލާމީ ބިނާވެށީގެ ފަރުމާތަކަށް ހާއްސަ މުބާރާތެއް ބޭއްވުމާއި، ހިރިގަލު މިސްކިތްތަކުގެ ފޮޓޯފޮތެއް ނެރުން ފަދަ އިލްމީ އަދި ސަގާފީ މަސައްކަތްތައް ކުރިއަށްދާނެއެވެ. އާމިނަތު އިބްރާހީމް ވިދާޅުވީ މި ހުރިހާ މަސައްކަތެއްގެ ވެސް މައިގަނޑު އަމާޒަކީ ދިވެހިންގެ މެދުގައި އޮތް އިސްލާމީ އަގީދާ ވަރުގަދަކޮށް، ބައިނަލްއަގްވާމީ އިސްލާމީ މުޖުތަމައުއާއި ރާއްޖެއާ ދެމެދު އޮންނަ ގުޅުން އިތުރަށް ބަދަހިކުރުން ކަމަށެވެ.