މިއަހަރުގެ މިހާތަނަށް ސަރުކާރު ހިއްސާވާ ކުންފުނިތަކުގެ ޑިވިޑެންޑް ނުވަތަ ފައިދާގެ ގޮތުގައި ދައުލަތުގެ ބަޖެޓަށް 160 މިލިއަން ރުފިޔާ ލިބިފައިވާއިރު، މިއީ ކުންފުނިތަކަށް ލިބުނު ފައިދާ ކުޑަވުމުގެ ސަބަބުން މިދިޔަ އަހަރާ އަޅާބަލާއިރު ބޮޑުތަނުން ދަށްވެފައިވާ އަދަދެއްކަން މާލީ ވުޒާރާގެ ތަފާސްހިސާބުތަކުން ހާމަވެއްޖެއެވެ.
ފިނޭންސް މިނިސްޓްރީގެ އެންމެ ފަހުގެ ރިޕޯޓުތަކަށް ބަލާއިރު، ނިމިދިޔަ އަހަރުގެ ހަމަ މި މުއްދަތުގައި ސަރުކާރަށް 258 މިލިއަން ރުފިޔާ ވަނީ ލިބިފައެވެ. އެހެންކަމުން މިއަހަރު ލިބުނު މިންވަރަކީ 36 އިންސައްތައިގެ ދަށްވުމެކެވެ. މީގެ އިތުރުން، މިއަހަރުގެ ދައުލަތުގެ ބަޖެޓުގައި ކުންފުނިތަކުގެ ފައިދާއިން 552 މިލިއަން ރުފިޔާ ހޯދުމަށް އަމާޒު ހިފާފައިވީ ނަމަވެސް، މިހާތަނަށް ހާސިލުކުރެވިފައި ވަނީ އަންދާޒާކުރި މިންވަރުގެ އެންމެ 30 އިންސައްތައެވެ.
ޑިވިޑެންޑާއި އިންޓްރެސްޓް ފަދަ އެހެނިހެން ގޮތްގޮތުން ލިބޭނެކަމަށް ބަޖެޓުގައި ލަފާކޮށްފައިވާ 769 މިލިއަން ރުފިޔާގެ ތެރެއިން ވެސް މިހާތަނަށް ދައުލަތަށް ވަދެފައި ވަނީ 243 މިލިއަން ރުފިޔާއެވެ. އެއީ ޖުމްލަ އަމާޒުގެ 31 އިންސައްތައެވެ. ފާހަގަކޮށްލެވޭ ގޮތުގައި މިދިޔަ އަހަރު މި ބައިން ދައުލަތަށް 823 މިލިއަން ރުފިޔާ ވަނީ ލިބިފައެވެ.
ދައުލަތުގެ ބެލުމުގެ ދަށުގައި ޖުމްލަ 30 ކުންފުންޏެއް ހިންގަމުން އަންނައިރު، އޭގެ ތެރެއިން މިއަހަރު ސަރުކާރަށް ޑިވިޑެންޑް ދައްކާނެކަމަށް އަންދާޒާކޮށްފައިވަނީ އެންމެ ހަ ކުންފުންޏަކުންނެވެ. އެއީ ދިރާގު، ބޭންކް އޮފް މޯލްޑިވްސް (ބީއެމްއެލް)، މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް)، އެޗްޑީސީ، އެމްޑަބްލިއުއެސްސީ އަދި އެމްޕީއެލްއެވެ.
މީގެ ތެރެއިން ވެސް ދައުލަތަށް އެންމެ ބޮޑު އާމްދަނީއެއް ލިބޭނެކަމަށް ބަލާފައި ވަނީ 262 މިލިއަން ރުފިޔާ އާއެކު ދިރާގުންނެވެ. ބީއެމްއެލްއިން 154 މިލިއަން، އެމްއޭސީއެލްއިން 50 މިލިއަން، އެމްޑަބްލިއުއެސްސީއިން 30 މިލިއަން، އެޗްޑީސީއިން 20 މިލިއަން އަދި އެމްޕީއެލްއިން 12 މިލިއަން ރުފިޔާ ދައްކާނެކަމަށް ބަޖެޓުގައި ވަނީ ހިމަނާފައެވެ. ނަމަވެސް ނިމިދިޔަ އަހަރު ސަރުކާރަށް ފައިދާ ބަހާފައި ވަނީ ހަމައެކަނި ދިރާގު، ބީއެމްއެލް އަދި އެޗްޑީސީގެ ފަރާތުންނެވެ.