އިނގިރޭސިވިލާތުގެ މަޝްހޫރު “ފެމިލީ ޓްރެވަލަރ އެވޯޑްސް 2026″ގައި ރާއްޖޭގެ ކުޑަ ވިލިނގިލި ރިސޯޓަށް “ބެސްޓް ލޯންގް-ހޯލް ފެމިލީ ސްޓޭ”ގެ ދާއިރާއިން “ހައިލީ ކޮމެންޑެޑް”އެވޯޑު ލިބިއްޖެއެވެ.
ފެމިލީ ޓްރެވަލަރ އިން އިންތިޒާމުކޮށްގެން ބޭއްވި މި އެވޯޑުތައް އިއުލާންކޮށްފައިވަނީ 11ސެޕްޓެމްބަރ 2026ގައި ލަންޑަންގައި ބޭއްވި ޚާއްސަ ރަސްމިއްޔާތެއްގައެވެ. މި އެވޯޑުގެ ފައިނަލިސްޓުން ހޮވާފައިވަނީ އާއިލީ ދަތުރުފަތުރާބެހޭ ތަޖުރިބާކާރު ނޫސްވެރިންގެ ޕެނަލަކުންނެވެ. އަދި ވަނަތައް ކަނޑައަޅާފައިވަނީ އާންމުންގެ ވޯޓުންނެވެ.
ވެލާނާ އިންޓަނޭޝަނަލް އެއަރޕޯޓުން ފުރައިގެން ސްޕީޑް ލޯންޗުގައި 30މިނެޓުން ދެވޭ ނޯތު މާލެ އަތޮޅުގައި އޮންނަ ކުޑަ ވިލިނގިލި ރިސޯޓަކީ އާއިލާތަކަށް ޚާއްސަކޮށް ފަރުމާކޮށްފައިވާ ރިސޯޓެކެވެ. މި ރިސޯޓުގައި ޕްރައިވެޓް ޕޫލާއެކު ޖުމްލަ 75ވިލާ އަދި ރެސިޑެންސް ހުރެއެވެ. މީގެ ތެރޭގައި 39ބީޗް ވިލާ އާއި 36އޯވަރވޯޓަރ ވިލާ ހިމެނެއެވެ. ގިނަ ކޮޓަރިތައް ހިމެނޭ ބޮޑެތި ވިލާތައް ހުރުމުން، މިއީ އާއިލާގެ އެންމެން އެކީގައި ޗުއްޓީ ހޭދަކުރުމަށް ވަރަށް އެކަށީގެންވާ ރިސޯޓެކެވެ.
ކުޑަކުދިންނަށް ޚާއްސަކޮށްގެން ރިސޯޓުގައި “ކުޑަ ފިޔޯ ކިޑްސް ކްލަބް”އެއް ހުރެއެވެ. އަދި ކުޑަކުދިންނަށް ޚާއްސަ ރޭލު ދުއްވުމުގެ ހަރަކާތްތަކާއި އެކި ކުޅިވަރުތައް ދުވަހުން ދުވަހަށް ކުރިއަށްގެންދެއެވެ. މީގެ އިތުރުން ރިސޯޓުގައި އޮންނަ 150މީޓަރުގެ ބޮޑު ސްވިމިންގ ޕޫލުގައި ކުޑަކުދިންނަށް ޚާއްސަ ތިލަ ސަރަހައްދެއް އޮވެއެވެ. ރާޅާއަޅަން ދަސްކުރަން ބޭނުންވާ ކުދިންނަށް ޚާއްސަ “ބޭބީ ޗިކަންސް”ގެ ނަމުން ނަންދެވިފައިވާ ސަރަހައްދެއްވެސް ރިސޯޓުގައި އޮވެއެވެ. ފުރާވަރުގެ ކުދިންނަށް ޓެނިސް، ޕަޑެލް، ޕިކްލްބޯލް، ފުޓްސަލް، އަދި ވޯޓަރ ސްޕޯޓްސް ފަދަ ގިނަ ހަރަކާތްތަކެއް ހުރެއެވެ.
ރިސޯޓުގައި 8ތަފާތު ރެސްޓޯރެންޓް ހުންނައިރު، 12އަހަރުން ދަށުގެ ކުދިންނަށް ކެއުން ހިލޭ ލިބޭނެ އިންތިޒާމު ހަމަޖެހިފައިވެއެވެ. މި ރެސްޓޯރެންޓްތަކުގެ ތެރޭގައި އިންޑިއާ އަދި އަރަބި ކެއުންތައް ލިބޭ “ސްޕައިސް”، އޭޝިއާގެ ރަހަތައް ލިބޭ “އީސްޓް”އަދި މެޑިޓަރޭނިއަން ކެއުންތައް ލިބޭ “މެޑް”ހިމެނެއެވެ.
މިކާމިޔާބީއާ ގުޅިގެން ކުޑަ ވިލިނގިލި ރިސޯޓުގެ ކޮމަރޝަލް ޑިރެކްޓަރ އަމްޖަދު ތައުފީގު ވިދާޅުވީ މިއީ އެ ރިސޯޓަށް ލިބުނު ވަރަށް ބޮޑު ފަޚުރެއް ކަމަށެވެ. އަދި އާއިލީ ޗުއްޓީއެއްގައި ކޮންމެ މީހަކަށްވެސް އެމީހަކު ބޭނުންވާ ގޮތަކަށް ރަށުގެ އުފާ ހާސިލްކުރުމުގެ މިނިވަންކަން އޮންނަން ޖެހޭނެކަމަށް ގަބޫލުކުރައްވާ ކަމަށާއި، މި އެވޯޑަކީ ރިސޯޓުގެ ޓީމުން ކުރާ މަސައްކަތުގެ އަގުވަޒަންކުރުމެއް ކަމަށް އޭނާ ވިދާޅުވިއެވެ.