އައިލެންޑް އޭވިއޭޝަން ސަރވިސަސް (އައިއޭއެސް)އިން ފަތުރުވެރިންނަށް ވިއްކާ އެތެރޭގެ ވައިގެ ދަތުރުފަތުރުގެ ޓިކެޓުގެ އަގުތައް މުރާޖަޢާކޮށް ހެޔޮކުރުމަށް، އާދީއްތަ ދުވަހު ބޭއްވި ވަޒީރުންގެ މަޖިލީހުގެ ބައްދަލުވުމުގައި ސަރުކާރުން ނިންމަވައިފިއެވެ.
ރައީސުލްޖުމްހޫރިއްޔާގެ އޮފީހުން މަޢުލޫމާތު ދެއްވާފައިވާ ގޮތުގައި، ޑޮމެސްޓިކް ފްލައިޓުތަކުން ބިދޭސީންގެ އަތުން ނަގަމުންދާ ފީތައް ކުޑަކުރުމަށް ވަޒީރުންގެ މަޖިލީހުން ފާސްކުރެއްވީ ލޯކަލް ޓޫރިޒަމަށް އިންޤިލާބީ ކުރިއެރުމެއް ހޯދައިދިނުމަށެވެ. މި ނިންމެވުމުގެ ސަބަބުން ދަތުރުފަތުރުގެ އަގުބޮޑުވުމުގެ ސަބަބުން ދިމާވާ ދަތިތައް ޙައްލުވެ، އަތޮޅުތެރެއަށް ޒިޔާރަތްކުރާ ފަތުރުވެރިންގެ ނިސްބަތް ވަރަށް ބޮޑަށް އިތުރުވެގެންދާނެކަމަށް ސަރުކާރުން ދެކެވަޑައިގަންނަވައެވެ. މިއާ އެކު ރަށްރަށުގައި ހިންގާ ގެސްޓްހައުސްތަކަށް އޭގެ އެންމެ ފުރިހަމަ އިޤުތިޞާދީ މަންފާ ލިބިގެންދާނެއެވެ.
މީގެ އިތުރުން ވެސް، ރައްޔިތުންގެ ދުޅަހެޔޮކަމާއި ތަރައްޤީއާ ގުޅުންހުރި މުހިންމު ފިޔަވަޅުތަކެއް އެ ދުވަހުގެ ކެބިނެޓު ޖަލްސާގައި ވަނީ އަޅުއްވާފައެވެ. އެގޮތުން، ދުންފަތާއި ނިކޮޓިން އެކުލެވޭ ބާވަތްތަކުގެ ނުރައްކާތެރިކަމަށް ޢާންމުން ހޭލުންތެރިކުރުވުމުގެ އިތުރުން، އަންނަން އޮތް ޖީލުތައް ދުންފަތުގެ ވަބާއިން ސަލާމަތްކުރުމަށްޓަކައި ޚާއްޞަ ‘ޖެނެރޭޝަނަލް ބޭން’އެއް ތަންފީޒުކުރުމަށް ވެސް ވަޒީރުންގެ މަޖިލީހުން ވަނީ ފާސްކުރައްވާފައެވެ. އަދި ސަރުކާރުން މިހާރު ހިންގަމުންދާ އެހެނިހެން މަޝްރޫޢުތަކާ ގުޅޭގޮތުން ވެސް މި ބައްދަލުވުމުގައި ވަނީ މަޝްވަރާކުރައްވައި މުހިންމު ނިންމެވުންތަކެއް ނިންމަވާފައެވެ.