ފައިސާ ދިންކަމަށް ބުނެ ފަތުރަމުންދާ ދޮގު ޚަބަރުތަކުގެ ސަބަބުން ވެރިކަންކުރާ ޕީޕަލްސް ނެޝަނަލް ކޮންގްރެސް(ޕީއެންސީ)ގެ ޕާލަމެންޓްރީ ގްރޫޕްގެ ބަދަހިކަން ނަގާލައި އެ ގްރޫޕް ރޫޅައިނުލެވޭނެ ކަމަށް، ބާރަށު ދާއިރާގެ މެންބަރު އިބްރާހީމް ޝުޖާއު ވިދާޅުވެއްޖެއެވެ.
މީސްމީޑިއާ އެކްސްގައި ހިއްސާ ކުރެއްވި ޕޯސްޓެއްގައި ވިދާޅުވީ، “އަދަދު” ނޫހުން ނެރެފައިވާ ޚަބަރެއްގައި ޕީއެންސީގެ މެންބަރުންނަށް ބައި ލައްކަ ރުފިޔާ ބަހާފައިވާ ކަމަށް ތުހުމަތުކޮށްފައިވާތީ، އެކަމަށް ރައްދުދެއްވަމުން ޝުޖާއު ވަނީ އެއީ އެއްވެސް ހަގީގަތެއް ނެތް ވާހަކަތަކެއްކަން ކަށަވަރުކޮށްދެއްވާފައެވެ. އޭނާ ފާހަގަކުރެއްވި ގޮތުގައި ސަރުކާރު ހިންގާ ޕާޓީގެ މެންބަރުންނަށް ވެސް މާލީ ގޮތުން ލިބެމުންދަނީ އިދިކޮޅު އެމްޑީޕީއާއި އެހެނިހެން ސިޔާސީ ޕާޓީތަކަށް ނިސްބަތްވާ މެންބަރުންނަށް ވެސް ދައުލަތުން ކަނޑައަޅާފައިވާ ރައްޔިތުންގެ މަޖިލީހުގެ މުސާރައާއި އިނާޔަތްތައް އެކަންޏެވެ.
PNC ޕާލަމެންޓް ގްރޫޕަށް ފައިސާ ބަހައިފި ކަމަށް ޢަދަދު ނޫހުން ވިދާޅުވެފައިވާ ޚަބަރަކީ ދޮގު ޚަބަރެއް.PNC ޕާލަމެންޓް ގްރޫޕް މެމްބަރުންނަށް ލިބެނީ MDP އާއި އެހެނިހެން މެމްބަރުންނަށް ލިބޭގޮތަށް ލިބޭ މަޖިލީހުގެ މުސާރަ.PNCPG މެމްބަރުންނާ ގުޅޭގޮތުން މިގޮތައް ފަތުރާ ދޮގު ޚަބަރުތައް…
— Ibrahim Shujau (@IbrahimShujaau) May 30, 2026
ސިޔާސީ މަގުސަދެއްގައި ފިތުނަ އުފެއްދުމަށްޓަކައި މިފަދަ އަސްލެއް ނެތް ވާހަކަތައް ފެތުރުން ހަރުކަށި އިބާރާތުން ކުށްވެރިކުރައްވަމުން، ޝުޖާއު ވިދާޅުވީ މިއީ ޕީއެންސީގެ މެންބަރުންގެ މެދުގައި އޮތް އެކުވެރިކަން ނަގާލުމަށް ބަޔަކު ރާވައިގެން ހިންގާ ނާކާމިޔާބު މަސައްކަތެއް ކަމަށެވެ. އަދި ވިހިވަނަ ރައްޔިތުންގެ މަޖިލީހުގައި ސަރުކާރަށް ލިބިފައިވާ ބޮޑު އަޣުލަބިއްޔަތުގެ ބޭނުން ހިފާނީ ހަމައެކަނި ދިވެހި ޤައުމާއި ރައްޔިތުންގެ ކުރިއެރުމާއި މަންފާއަށްކަމުގެ ޔަޤީންކަން ވެސް އޭނާ ދެއްވިއެވެ.
ފާހަގަކޮށްލެވޭ ގޮތުގައި، ޝުޖާއުގެ އިތުރުން ޕީއެންސީއަށް ނިސްބަތްވެވަޑައިގަންނަވާ މަޖިލީހުގެ ވަރަށް ގިނަ މެންބަރުން އަންނަނީ މި ތުހުމަތުތައް ދޮގުކުރައްވައި ޝުޢޫރު ފާޅުކުރައްވަމުންނެވެ. ފަހަކަށް އައިސް ސިޔާސީ ވާދަވެރިކަމުގެ ތެރެއިން، ރައީސުލްޖުމްހޫރިއްޔާއާއި ސަރުކާރުގެ އިސް މަޤާމުތަކުގައި ތިއްބެވި ބޭފުޅުންނަށް އަމާޒުކޮށް ސާބިތުނުހިފޭ ތުހުމަތުތައް ބައެއް މީޑިއާތަކުން ފަތުރަމުންދާކަން އާންމުން ވެސް އަންނަނީ ފާހަގަކުރަމުންނެވެ.