ދިވެހިރާއްޖޭގެ މެޖިސްޓްރޭޓް ކޯޓުތަކުން ފޯރުކޮށްދޭ ހިދުމަތްތައް އެއް ފެންވަރެއްގައި ހިފެހެއްޓުމަށްޓަކައި އެކުލަވާލި އާ ޤަވާއިދަށް މިއަދު އަމަލުކުރަން ފެށުމާ އެކު، 2008ވަނަ އަހަރުން ފެށިގެން އޮތް ޤާނޫނީ ބޮޑު ހުސްކަމަކަށް ނިމުން އައިސްފިއެވެ.
މިއަހަރުގެ ޖުލައި މަހުގެ 1ވަނަ ދުވަހު ސަރުކާރުގެ ގެޒެޓުގައި އާންމުކޮށްފައިވާ މި ޤަވާއިދަކީ، އާ ޤާނޫނުއަސާސީ ވުޖޫދަށް އައިސް ޖަސްޓިސް މިނިސްޓްރީ އުވިގެން ދިޔުމާ ގުޅިގެން މެޖިސްޓްރޭޓް ކޯޓުތަކުގެ ހިންގުމަށް ކުރިމަތިވެފައި އޮތް 18 އަހަރުގެ ދިގު ހުސްކަމަށް ހައްލު ގެނެސްދޭނެ މުހިންމު ނިޒާމެކެވެ.
މި ބަދަލާ އެކު، މުޅި ރާއްޖޭގެ ހުރިހާ މެޖިސްޓްރޭޓް ކޯޓުތަކެއްގައި މައްސަލަތައް ހުށަހެޅުމާއި، ބަލައިގަތުމުގެ އިތުރުން ޝަރީއަތް ހިންގުމުގެ މަރުހަލާތައް އެއް އުސޫލަކަށް ފެތިގެންދާނެއެވެ. އަދި ކޯޓުތަކަށް ރަޖިސްޓްރާއިން ހަމަޖެއްސުމަށް އާ ގަވާއިދުގައި ކަނޑައަޅާފައިވާއިރު، މިއީ ކުރިން ކޯޓުގެ އެޑްމިނިސްޓްރޭޓަރުންނާއި ފަނޑިޔާރުން ކުރައްވަމުން ގެންދެވި ބުރަ އިދާރީ މަސައްކަތްތަކަށް ލިބިގެންދާނެ ވަރަށް ބޮޑު ލުޔެކެވެ.
މީގެ އިތުރުން، މި ޤަވާއިދުގެ 83ވަނަ މާއްދާގެ ދަށުން، ކައިވެނި ކުރުމަށް އެދި ހުށަހަޅާއިރު ދެމީހުންގެ ތެލަސީމިއާ ނަތީޖާ ހުށަހެޅުން ވަނީ މަޖުބޫރުކޮށްފައެވެ. އެހެންނަމަވެސް، އެކެއްގެ ގައިގައި ތެލަސީމިއާގެ އަސަރު ނެތްކަން ޔަގީންވާނަމަ، އަނެކާގެ ޓެސްޓު ނަތީޖާ ހުށަހެޅުން ލާޒިމެއް ނުވާނެއެވެ. ހަމައެއާ އެކު، ކުށުގެ ތުހުމަތުގައި ހައްޔަރުކުރާ ފަރާތްތަކުގެ ބަންދާމެދު ގޮތް ނިންމުމަށް ބާއްވާ މަޖިލިސްތަކުގެ ވަގުތުތަކާއި ހިނގާނެ އުސޫލުތައް ވެސް ވަރަށް ސާފުކޮށް މި ޤަވާއިދުގައި ބަޔާންކޮށްފައިވެއެވެ.
އައު ޤަވާއިދަށް ކޯޓުތަކުގެ އިދާރީ މުވައްޒަފުންނާއި ފަނޑިޔާރުން ފަރިތަކުރުމުގެ ގޮތުން، ޖުޑީޝަލް އެކަޑަމީގެ ފަރާތުން ވަނީ ޚާއްސަ ތަމްރީނުތަކެއް ވެސް ދާދިފަހުން ހިންގާފައެވެ.