ކުންފުނީގެ މާލީ ހާލަތު ރަނގަޅުކޮށް ހިންގުން ހަރުދަނާކުރުމަށްޓަކައި، ފެނަކަ ކޯޕަރޭޝަނުން ތަޢާރަފުކުރި ރިޑަންޑަންސީ ޕޮލިސީގެ ދަށުން އަމިއްލައަށް ވަޒީފާ ދޫކޮށްލަން ބޭނުންވި މުވައްޒަފުންނަށް، އެއްބަސްވެފައިވާ ގޮތުގެ މަތިން ހަތަރު މަސްދުވަހުގެ މުސާރަ ދޫކޮށްފައިވާކަމަށް އެ ކުންފުނިން ހާމަކޮށްފިއެވެ.
ފެނަކައިން އާންމުކުރި ނޫސްބަޔާނެއްގައި ބަޔާންކޮށްފައިވާ ގޮތުގައި، ކުންފުނީގެ މުވައްޒަފުންގެ އަދަދު މަދުކުރުމުގެ (ރައިޓް ސައިޒް ކުރުމުގެ) ސިޔާސަތުގެ ތެރެއިން މި ފުރުސަތު ހުޅުވާލީ، ވަޒީފާއިން ވަކިވާން ޖެހޭ ފަރާތްތަކަށް އިއްޒަތްތެރިކަމާ އެކު މާލީ އެހީތެރިކަމެއް ފޯރުކޮށްދިނުމުގެ ބޭނުމުގައެވެ. އެގޮތުން، މިދިޔަ ޖޫން މަހުގެ 2ވަނަ ދުވަހު ނެރުނު އެތެރޭގެ މެމޯއަކާ ގުޅިގެން ވަޒީފާ ދޫކޮށްލަން އެދުނު ފަރާތްތަކާ އެކު ޚާއްޞަ އެއްބަސްވުމެއް ގާއިމުކޮށް، އެ ލިޔުމާ އެއްގޮތަށް އެ ފަރާތްތަކަށް ލިބެންޖެހޭ ފައިސާ މިހާރު ވަނީ ހަވާލުކޮށްފައެވެ. ކުންފުނިން ދެކޭގޮތުގައި މިއީ ދެމެހެއްޓެނިވި ގޮތެއްގައި ރައްޔިތުންނަށް ޚިދުމަތް ފޯރުކޮށްދިނުމަށް އެޅުނު މުހިންމު ފިޔަވަޅެކެވެ.
މީގެ އިތުރުން، ބައެއް މީޑިއާތަކާއި މީސްމީޑިއާގެ މަންސަތަކުގައި ފެނަކައިން މުވައްޒަފުންނަށް މަކަރުހަދައި އޮޅުވާލާފައިވާކަމަށް ބުނެ ފަތުރަމުންދާ ވާހަކަތައް އެ ކުންފުނިން ވަނީ ހަރުކަށި އިބާރާތުން ދޮގުކޮށްފައެވެ. އެފަދަ އެއްވެސް އަމަލެއް ނުހިންގާނެކަމުގެ ޔަގީންކަން ދެމުން، އެ އިދާރާއިން ބުނީ ހުރިހާ ކަމެއް ވެސް ކުރިއަށްގެންދަނީ ކަނޑައެޅިފައިވާ އުސޫލުތަކާ އެއްގޮތަށް، އެއްވެސް ފަރާތަކަށް ގެއްލުމެއް ނުލިބޭނެ ފަދައިން ކަމަށެވެ.
ފާހަގަކޮށްލެވޭ ގޮތުގައި، އިނާޔަތާ އެކު އަމިއްލައަށް ވަޒީފާއިން ވަކިވުމަށް ހުޅުވާލި މި ޚާއްޞަ ސްކީމްގައި ބައިވެރިވުމަށް 108 މުވައްޒަފަކު މީގެ ކުރިން ވަނީ ފޯމު ހުށަހަޅާފައެވެ.