ދުނިޔޭގެ ނޫސްވެރިކަމުގެ މިނިވަންކަމުގެ ދުވަހާ ގުޅުވައިގެން މީސްމީޑިއާ މެދުވެރިކުރައްވައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވި ހާއްސަ މެސެޖެއްގައި، ޑިމޮކްރެސީގެ ހަމަތައް ނަގަހައްޓައި ގައުމު ބިނާކުރުމުގައި ނޫސްވެރިން އަދާކުރާ މުހިންމު ދައުރު ފާހަގަކުރައްވައި، މުސްތަގިއްލު މީޑިއާތަކަށް ސަރުކާރުން އަބަދުވެސް ފުރިހަމަ އެއްބާރުލުމާއި އެހީތެރިކަން ދެއްވާނެކަމުގެ ޔަގީންކަން ދެއްވައިފިއެވެ.
ނޫސްވެރިންނަށް ފަހި މާހައުލެއް ގާއިމުކޮށްދިނުމަކީ ދައުލަތުގެ އަމާޒެއްކަން ފާހަގަކުރައްވަމުން، މައުލޫމާތު ހޯދުމުގެ މަގުތައް ތަނަވަސްކޮށްދީ ދެފުށްފެންނަ ނިޒާމެއްގެ ތެރެއިން ކަންކަން ކުރުމަށް ސަރުކާރުން މީޑިއާތަކަށް އިންވެސްޓުކުރަމުންދާކަން އެމަނިކުފާނު ހާމަކުރެއްވިއެވެ. މިފަދަ ހަރުދަނާ ފިޔަވަޅުތަކުގެ ސަބަބުން ރައްޔިތުންނާއި ސަރުކާރާ ދެމެދު އޮންނަ އިތުބާރު ބޮޑުވެ، އާންމުންގެ ބައިވެރިވުން އިތުރުކުރެވި، ޖަވާބުދާރީވުން ހަރުދަނާވެގެންދާނެކަމަށް ރައީސް ވިދާޅުވިއެވެ.
މީގެ އިތުރުން، ހިޔާލުފާޅުކުރުމުގެ މިނިވަންކަން ދިފާއުކޮށް، ތެދު މައުލޫމާތު ފެތުރުމަށް އަމިއްލަ ފަރުދުންނާއި އެކި ޖަމިއްޔާތަކުން ކުރަމުންގެންދާ ބުރަ މަސައްކަތްތަކަށް ރައީސް ވަނީ ޝުކުރު އަދާކުރައްވާފައެވެ. އަދި ހަމައެހެންމެ، ރާއްޖެއާއި ބައިނަލްއަގުވާމީ މައިދާނުގައި ސުލްހަމަސަލަސްކަން ގާއިމުކޮށް، ދެމެހެއްޓެނިވި ތަރައްގީއަށް ވާސިލުވުމަށްޓަކައި މިނިވަން ނޫސްވެރިކަމެއް އޮތުމަކީ ނުހަނު ބޭނުންތެރި ކަމެއްކަން އެމަނިކުފާނުގެ މެސެޖުގައި އޮތީ ބަޔާންކުރައްވާފައެވެ.
ނޫސްވެރިންގެ ފަންނީ ގާބިލުކަމާއި ކެރޭކަމަށް ތައުރީފުކުރައްވަމުން، ރައީސް މުއިއްޒު ވަނީ ގައުމީ މަސްލަހަތު އިސްކުރުމަށް ގޮވާލައްވާފައެވެ. އެގޮތުން، ވަކި އަތަކަށް ނުޖެހި، ސުލޫކީ މިންގަނޑުތަކާ އެއްގޮތްވާ ގޮތުގެ މަތިން ޒިންމާދާރުކަމާއެކު ތެދު ހަބަރުތައް ގެނެސްދިނުމުގައި ދެމިތިބުމަށް އެމަނިކުފާނު ނޫސްވެރިންގެ ކިބައިން އެދިވަޑައިގެންނެވިއެވެ.