މާލޭގެ އުތުރުފަރާތު ބަނދަރުގެ ޖެޓީތައް ތަރައްޤީކުރުމުގެ ޢަމަލީ މަސައްކަތް ފެށުމަށްޓަކައި، މަސްވެރިންގެ ޕާކުން ފެށިގެން ނާދީ ގޯޅިއާ ހަމައަށް އަޅާފައިވާ ހުރިހާ އުޅަނދުފަހަރެއް ނެގުމަށް އަންގަވައިފިއެވެ.
ބިނާރާ، ގެދޮރުވެރިކަމާ އަދި އުމްރާނީ ތަރައްޤީއާ ބެހޭ ވުޒާރާއިން ނެރުނު ބަޔާނެއްގައި ވަނީ، އަންނަ ހުކުރު ދުވަހުގެ ރޭގަނޑު 11:00ގެ ކުރިން އެ ސަރަހައްދު ހުސްކުރުމަށް އެދިފައެވެ. މި ސަރަޙައްދަކީ ކޮންމެ ދުވަހަކު ވެސް ގިނަ ޢަދަދެއްގެ ރައްޔިތުން ލަފާފުރުމަށް ބޭނުންކުރާ ތަނަކަށްވުމާ އެކު، ސަރުކާރުގެ އަމާޒަކީ ދަތުރުވެރިންނަށް ދިމާވާ ދަތިތަކަށް ދާއިމީ ހައްލެއް ހޯދައިދީ، ލަފާފުރުމުގެ ނިޒާމު އިތުރަށް ފަސޭހަކޮށްދިނުމެވެ. އެހެންކަމުން، ދީފައިވާ މުހުލަތުގެ ތެރޭގައި ނުނަގާ ހުންނަ އުޅަނދުތައް، ވުޒާރާގެ ބެލުމުގެ ދަށުން އެ ސަރަޙައްދުން ދުރުކުރާނެކަމުގެ އިންޒާރު ވެސް ކަމާބެހޭ ފަރާތްތަކުން ވަނީ ދެއްވާފައެވެ.
މާލެ އުތުރު ފަރާތު ބަނދަރުގެ ޖެޓީތައް ތަރައްޤީ ކުރުމުގެ މަޝްރޫޢާ ގުޅޭ
އިއުލާނު: https://t.co/vEgUEfIRXG pic.twitter.com/DacGnlMkkk
— Ministry of Infrastructure, Housing and Urban Dev. (@MIHUDmv) September 30, 2026
އުތުރުފަރާތު ބަނދަރުގެ ޖެޓީތައް ތަރައްޤީކުރުމުގެ މި މަސައްކަތަކީ ބޮޑުތަކުރުފާނު މަގު ޒަމާނީ ފެންވަރަށް ތަރައްޤީކުރުމަށް ކުރިއަށްގެންދާ ބޮޑު މަޝްރޫޢުގެ ތެރެއިން ކުރެވޭ ކަމެކެވެ. މި މަޝްރޫޢުގެ ދަށުން، މާލޭގެ ތޮށިގަނޑުން ބޭރަށް 6 މީޓަރު އިތުރުކޮށް މަގު ފުޅާކުރުމުގެ އިތުރުން، އާންމުންނަށް ފަސޭހަވާނެހެން ޖާގަ ތަނަވަސް ޕާކިންގ ޒޯނެއް ވެސް އެ ސަރަޙައްދުގައި މިހާރު ވަނީ ޤާއިމުކޮށްފައެވެ.