މާލޭގައި އިންތިހާއަށް ބޮޑުވެފައިވާ ދަތުރުފަތުރުކުރުމުގެ ދަތިތަކާއި ޓްރެފިކްގެ ތޮއްޖެހުމަށް ދާއިމީ އަދި ވަށާޖެހޭ ހައްލެއް ހޯދައިދިނުމުގެ މަގުސަދުގައި، ސަރުކާރުގެ ކަމާގުޅޭ ހުރިހާ މުއައްސަސާތަކެއް ގުޅިގެން ހާއްސަ މަސައްކަތްތަކެއް ފަށައިފިއެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅުދައްކަވަމުން އިޤްތިޞާދީ ތަރައްޤީއާއި ވިޔަފާރިއާއި ބެހޭ ވަޒީރު މުޙައްމަދު ސައީދު ހާމަކުރެއްވި ގޮތުގައި، މި އައު މަސައްކަތަކީ ރައްޔިތުންނަށް ފެންނަނިވި އަދި އެނގުންވާ ފަދަ ލުއިފަސޭހަތަކެއް ހޯދައިދިނުމަށް ފެށި މަސައްކަތެކެވެ. މިގޮތުން، ބޮޑުތަކުރުފާނު މަގު ފުޅާކޮށް ޒަމާނީ ފެންވަރަށް ތަރައްޤީކުރުމުގެ މަޝްރޫޢުގެ ތެރެއިން ޕާކިންގ މައްސަލައާއި މަގުތަކުގެ ތޮއްޖެހުމަށް ވަރަށް ބޮޑު ލުޔެއް ލިބިގެންދާނެކަމުގެ ޔަޤީންކަން އޭނާ ދެއްވިއެވެ.
މި ބޮޑު މަޝްރޫޢުގައި އަމަލީގޮތުން ބައިވެރި ވަނީ ދަތުރުފަތުރާއި ގެދޮރުވެރިކަމާ ބެހޭ ވުޒާރާތަކުގެ އިތުރުން، އެންވަޔަރަމަންޓް މިނިސްޓްރީއާއި، އެޗްޑީސީ އަދި ދިވެހި ފުލުހުންގެ ޚިދުމަތެވެ. ސަޢީދު ވިދާޅުވީ ޓްރާންސްޕޯޓް މިނިސްޓްރީން މިހާތަނަށް ވެސް ރަނގަޅު ފިޔަވަޅުތަކެއް އަޅާފައިވާ ކަމަށާއި، ނަމަވެސް މިހާރު އަމާޒު ހިފާފައި ވަނީ ރައްޔިތުންގެ ޚިޔާލުތަކަށް ބިނާކޮށް ހުރިހާ ފަރާތްތަކެއްގެ މަޝްވަރާއާ އެކު އިތުރު ހެޔޮ ބަދަލުތަކެއް ގެނައުމަށް ކަމުގައެވެ.
ދުނިޔޭގެ ނިސްބަތަށް ބެލިކަމުގައިވިޔަސް މާލެއަކީ އުޅަނދުތައް ގިނަ އަދި ތޮއްޖެހުން ބޮޑު ސިޓީއެއްކަން ފާހަގަކުރައްވައި، އޭގެ މައިގަނޑު ސަބަބަކީ މާލެއަށް އޮތް ބޮޑު ޑިމާންޑްކަމުގައި ވަޒީރު ސިފަކުރެއްވިއެވެ. ހުޅުމާލޭގެ ފިޔަވަހިތަކާއި މާލެއާ ދެމެދު ބްރިޖު މެދުވެރިކޮށް ކުރާ ދަތުރުތައް އިތުރުވަމުންދާތީ، މިއީ ހުރިހާ ސިޔާސީ ޕާޓީތަކުން ވެސް ގަބޫލުކުރާ ގައުމީ މައްސަލައެއްކަން އޭނާ ފާހަގަކުރެއްވިއެވެ. އެހެންކަމުން، މި ބޮޑު މައްސަލަ ހައްލުކުރުމަށްޓަކައި އެމްޑީޕީގެ މެޖޯރިޓީ އޮންނަ މާލޭ ސިޓީ ކައުންސިލްގެ ފުރިހަމަ އެއްބާރުލުމާއި އެހީތެރިކަން ލިބޭނެކަމުގެ އުންމީދު ކުރައްވާކަމަށް ވެސް ސަޢީދު ވަނީ ވިދާޅުވެފައެވެ.