ރައްޔިތުންގެ މަޖިލީހުގެ ނައިބު ރައީސްކަމުގެ މަގާމަށް، ސަރުކާރު ހިންގާ މައި ޕާޓީ ޕީއެންސީގެ ފަރާތުން އޭދަފުށީ ދާއިރާގެ މެންބަރު އަހްމަދު ސަލީމް އަދި އިދިކޮޅު އެމްޑީޕީގެ ފަރާތުން ވައިކަރަދޫ ދާއިރާގެ މެންބަރު ހުސައިން ޒިޔާދުގެ ނަންފުޅު މި އަދުގެ ޖަލްސާގައި ހުށަހަޅައިފިއެވެ.
ވެރިކަންކުރާ ޕާޓީގެ ފަރާތުން ސަލީމްގެ ނަންފުޅު މަޖިލީހުގެ ތަޅުމަށް އިއްވައިދެއްވީ ޕީއެންސީގެ ޕާލިމެންޓަރީ ގްރޫޕްގެ ލީޑަރު އިބްރާހީމް ފަލާހެވެ. ހަމައެއާ އެކު، އިދިކޮޅު އެމްޑީޕީން ޒިޔާދު އެ މަގާމަށް ގެނައުމަށް ހުށަހެޅުއްވީ އެ ޕާޓީގެ ވަގުތީ ޗެއާޕާސަންގެ މަގާމުގައި ހުންނެވި އަބްދުލްޣަފޫރު މޫސާއެވެ.
އައު ނައިބު ރައީސަކު ކަނޑައެޅުމަށް ހަމަޖެހިފައި ވަނީ މަޖިލީހުގެ މެންބަރުންގެ މެދުގައި ނެގޭ ސިއްރު ވޯޓަކުންނެވެ. މި ވޯޓުލުމުގެ ކަންކަން އިންތިޒާމުކޮށް ކުރިއަށް ގެންދިއުމަށްޓަކައި މިއަދު ވަނީ ފަސް މެންބަރުންގެ މައްޗަށް އެކުލެވޭ ހާއްސަ ކޮމިޓީއެއްވެސް ނަގާފައެވެ. އެ ކޮމިޓީގައި ތަމްސީލުކުރައް ވަނީ މެންބަރު ހުސްނީ މުބާރިކް، މެންބަރު އަހްމަދު ޒަމީރު، މެންބަރު ޑރ. އަނާރާ ނައީމް، މެންބަރު އިބްރާހީމް ނާޒިލްގެ އިތުރުން އަމިއްލަ މެންބަރެއްގެ ހައިސިއްޔަތުން ތުޅާދޫ ދާއިރާގެ މެންބަރު އަބްދުލްހަންނާނެވެ.
މެޖޯރިޓީ ލީޑަރު ފަލާހުގެ ހުށަހެޅުއްވުމަކަށް، އަބްދުއްލަތީފް މުހައްމަދުގެ ތާއީދާ އެކު މި ކޮމިޓީ އެކުލަވާލާފައި ވަނީ ވޯޓުގައި ބައިވެރިވެވަޑައިގެންނެވި 65 މެންބަރުންގެ ސާފު އިއްތިފާގުންނެވެ.
ގާނޫނުހަދާ މަޖިލީހުގެ ނައިބު ރައީސްކަމުގެ ގޮނޑި ހުސްވެފައި ވަނީ، އެ މަގާމުގައި ކުރިން ހުންނެވި ނާޒިމް މަގާމުން ވަކިކުރުމަށް ޕީއެންސީގެ ޕީޖީ ގްރޫޕުން މައްސަލައެއް ވައްދައި، އެކަން އެޖެންޑާކޮށްފައި ވަނިކޮށް އޭނާ އަމިއްލަފުޅަށް އިސްތިއުފާ ދެއްވުމާ ގުޅިގެންނެވެ.