އޭޕްރީލް މަހު ބޭއްވި ލޯކަލް ކައުންސިލް އިންތިޚާބުގައި މ. ވޭވަށު ކައުންސިލްގެ ގޮނޑިއެއް އެމްޑީޕީގެ ކެންޑިޑޭޓަށް ލިބިފައިވަނިކޮށް، ހައިކޯޓުން އެ ނަތީޖާ ބާތިލުކޮށް ޕީއެންސީއަށް ގޮނޑި ކަށަވަރުކޮށްދިން މައްސަލަ ދިވެހިރާއްޖޭގެ ސުޕްރީމް ކޯޓުން ބަލައިގަނެފިއެވެ.
ސުޕްރީމް ކޯޓުގެ ރަޖިސްޓްރާ ވަނީ އެމްޑީޕީގެ ކެންޑިޑޭޓް އަހްސަން ނައީމްގެ ފަރާތުން އިލެކްޝަންސް ކޮމިޝަނާއި ޕީއެންސީގެ ކެންޑިޑޭޓް މުހައްމަދު ނަޒީހުގެ މައްޗަށް ރައްދުވާގޮތަށް ހުށަހެޅި މި އިސްތިއުނާފީ މައްސަލަ ކޯޓަށް ވެއްދުމުގެ ހުއްދަ ދެއްވާފައެވެ. ކޯޓުގެ އާންމު އުސޫލު އޮންނަ ގޮތުން ހުއްދަ ދިނުމަކީ މައްސަލަ ރަސްމީކޮށް ބަލައިގަތުމެވެ. ދެން އޮންނާނީ އިދާރީ ގޮތުން ފުރިހަމަކުރަންޖެހޭ ރަޖިސްޓްރޭޝަން ފީ ދެއްކުމުގެ މަރުހަލާއެވެ. ނަމަވެސް، މައި ޕާޓީ އެމްޑީޕީގެ ފަރާތުން ވަކިން ހުށަހެޅި މައްސަލައަކާމެދު ކޯޓުން އަދި ވަކި ގޮތެއް ނިންމާފައިވާކަން ވެބްސައިޓުން އެނގޭކަށް ނެތެވެ.
މި މައްސަލައިގެ ފެށުމަކީ ފާއިތުވި އޭޕްރީލް މަހުގެ 4ވަނަ ދުވަހު އޮތް އިންތިޚާބެވެ. އެ އިންތިޚާބުގައި ވޭވަށު ކައުންސިލްގެ އާންމު ގޮނޑިއަކަށް ވާދަކުރެއްވި އަހްސަނަށް 121 ވޯޓު ލިބިވަޑައިގެންނެވިއިރު، ނަޒީހަށް ލިބިވަޑައިގަތީ 119 ވޯޓެވެ. ދެ ވޯޓުގެ ތަފާތަކުން އަހްސަން ކުރީގައި އޮއްވައި، ނަޒީހުގެ ފަރާތުން ހައިކޯޓަށް މައްސަލަ ހުށަހެޅުމުން، ކޯޓުން ވަނީ އަހްސަނަށް ލިބުނު ތިން ވޯޓެއް ބާތިލުކަމަށް ކަނޑައަޅާފައެވެ. ތިން ފަނޑިޔާރުންގެ ބެންޗަކުން ބެއްލެވި އެ މައްސަލައިގައި، ދެ ފަނޑިޔާރުންގެ އަޣުލަބިއްޔަތުން ނިންމެވި ނިންމެވުމާ އެކު އަހްސަންގެ ވޯޓުގެ އަދަދު 118 އަށް ވެއްޓި، އިންތިޚާބުގެ ކާމިޔާބީ ނަޒީހަށް ފުރޮޅުނެވެ. މި ނިންމުމާ ދެކޮޅަށް ރައުޔު ނެރުއްވީ ފަނޑިޔާރު އިބްރާހީމް މާހިރެވެ.
ފާހަގަކޮށްލެވޭ ގޮތުގައި، ކޯޓަށް މައްސަލަ ދިއުމުގެ ކުރިން ކޮމްޕްލަޔަންސް ބިއުރޯއަށް ހުށަހެޅުނު ޝަކުވާއަކާ ގުޅިގެން އިލެކްޝަންސް ކޮމިޝަނުން ވެސް ވަނީ ވޯޓު ފޮށި އަލުން ގުނާފައެވެ. އެފަހަރު ދެ ކެންޑިޑޭޓުންގެ ވޯޓުންކުރެ ކޮންމެ މީހަކަށް އެއް ވޯޓު އުނިވި ނަމަވެސް، އިންތިޚާބުގެ ނަތީޖާއަށް ބަދަލެއް އައިސްފައެއް ނުވެއެވެ. އިންތިޚާބީ މައްސަލަ ކޯޓުގައި އޮތުމުގެ ސަބަބުން، ވޭވަށު ކައުންސިލްގެ އެހެން މެމްބަރުން ހުވާކުރެއްވިއިރު މި ގޮނޑިއަށް އިންތިޚާބުވި ކެންޑިޑޭޓް އަދި ހުވާކުރައްވާފައެއް ނުވެއެވެ.