ވަޒީފާގެ ބާޒާރުގެ ކަންކަން އިތުރަށް ހަރުދަނާކުރުމުގެ މަގުސަދުގައި ފަރުމާކޮށްފައިވާ “މައި ކެރިއާ ޕޯޓަލް” މިއަދު ހެނދުނު ބޭއްވި ހާއްސަ ރަސްމިއްޔާތެއްގައި، ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާ ބެހޭ ވަޒީރު ޢަލީ އިޙްސާން ރަސްމީކޮށް އިފުތިތާހުކޮށްދެއްވައިފިއެވެ.
ވޯލްޑް ބޭންކުގެ މާލީ އެހީތެރިކަން ލިބިގެން ހިންގާ “ސައިލްސް” މަޝްރޫއުގެ ތެރެއިން، ނޭޝަނަލް ކެރިއާ ސާވިސް (އެންސީއެސް)އިން އިސްނަގައިގެން ގާއިމުކުރި މި ޑިޖިޓަލް މަންސައަކީ ދިވެހިރާއްޖޭގެ ވަޒީފާގެ މާހައުލަށް އިންގިލާބީ ކުރިއެރުމެއް ގެނެސްދޭނެ ނިޒާމެއް ކަމަށް އެ އިދާރާއިން މައުލޫމާތުދެއެވެ. މި ޕޯޓަލްގެ އެންމެ ބޮޑު ބޭނުމަކީ މުވައްޒަފުން ހޯދުމަށާއި ވަޒީފާތަކަށް ކުރިމަތިލުމަށް އޮންނަ އިޖުރާއަތްތައް ވީހާވެސް ލުއިފަސޭހަކޮށް، ހުރިހާ ފަރާތްތަކަށް ވެސް ފަސޭހައިން ބޭނުންކުރެވޭނެ މާހައުލެއް ގާއިމުކޮށްދިނުމެވެ.
މި ޒަމާނީ މަންސައިގެ އެހީގައި، ވަޒީފާއަށް ކުރިމަތިލާ ފަރާތްތަކަށް އެމީހުންގެ ތައުލީމީ ފެންވަރާއި، ލިބިފައިވާ ތަމްރީނުތަކުގެ އިތުރުން މަސައްކަތުގެ ތަޖުރިބާތައް ފަސޭހަކަމާ އެކު އެއްތަނަކުން ފެންނަން ހުންނާނެހެން ރައްކާކުރެވޭނެއެވެ. ވަޒީފާދޭ ފަރާތްތަކުން ވަޒީފާގެ ފުރުސަތުތައް އިއުލާނުކުރުމާ އެކު، އަމިއްލަ ޝައުގުވެރިކަން ހުންނަ ދާއިރާތަކުން ހުރި ފުރުސަތުތައް ހޯދައި، ވަޒީފާއަށް އެދި ހުށަހެޅުމުގެ ހުރިހާ މަރުހަލާއެއް ވެސް މި ޕޯޓަލް މެދުވެރިކޮށް އޮންލައިންކޮށް ފުރިހަމަކުރެވޭނެ އިންތިޒާމު ވަނީ ހަމަޖައްސާފައެވެ.
މީގެ އިތުރުން، މި ނިޒާމު މެދުވެރިކޮށް ކެރިއާ ގައިޑޭންސް ކައުންސިލަރުންނާ ގުޅިގެން ވަޒީފާއާ ގުޅޭ ހާއްސަ ލަފަޔާއި އިރުޝާދު ހޯދުމުގެ ފުރުސަތު ވެސް ފަހިވެގެންދާނެއެވެ. އެގޮތުން، ވަޒީފާގެ މައިދާނުގައި ކުރިއަށްދާނެ ގޮތްތައް ރާވައި، ދުރު ރާސްތާގެ ލަނޑުދަނޑިތަކަށް ވާސިލުވުމަށްޓަކައި ކަމާގުޅޭ ތަޖުރިބާކާރުންގެ އެހީގައި ފުރިހަމަ މަގުޗާޓެއް އެކުލަވާލުމުގެ ހިދުމަތް ވެސް ޕޯޓަލުން ލިބެން ހުންނާނެކަން އެންސީއެސްއިން ވަނީ ފާހަގަކޮށްފައެވެ.