ރާއްޖޭގެ ބާޒާރަށް އިންޑިއާގެ އެންމެ މަޤުބޫލު އެއް ޑެއިރީ ބްރޭންޑް ކަމަށްވާ “އަމުލް”ގެ އުފެއްދުންތައް، ހުޅުމާލޭގައި މިހާރު ކުރިއަށްދާ ހޮޓެލް އޭޝިއާ އެގްޒިބިޝަންގެ ތެރެއިން ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ)އިން ރަސްމީކޮށް ތަޢާރަފުކޮށްފިއެވެ.
“ދަ ޓޭސްޓް އޮފް އިންޑިއާ”ގެ ނަމުން ދުނިޔޭގެ އެކި ކަންކޮޅުތަކުގައި މަޝްހޫރުކަން ހޯދާފައިވާ އާނަންދު މިލްކް ޔޫނިއަން ލިމިޓެޑް ނުވަތަ އަމުލް ބްރޭންޑްގެ ތަފާތު ބާވަތްތައް މިހާރު އެސްޓީއޯ ޕީޕަލްސް ޗޮއިސް ފިހާރައިން ގަންނަން ލިބެން ހުންނާނެކަމަށް އެ ކުންފުނިން މަޢުލޫމާތުދެއެވެ. މީގެ ތެރޭގައި އެކި ވައްތަރުގެ ކިރާއި، ޗީޒް، ބަޓަރު އަދި އައިސްކްރީމް ފަދަ އުފެއްދުންތައް ހިމެނެއެވެ.
އެސްޓީއޯގެ އެކްޒެކެޓިވް ކޮމިޓީގެ މެންބަރުން ބައިވެރިވެވަޑައިގެންނެވި ޚާއްޞަ ރަސްމިއްޔާތެއްގައި މި ބްރޭންޑް ނެރެދެއްވުމަށް ފަހު، އެސްޓީއޯ ޕީޕަލްސް ޗޮއިސްގެ ސޭލްސް މެނޭޖަރު އައިޝަތު ނަޒާހަތު ވިދާޅުވީ، މިއީ ދިވެހިންގެ ރަހަތަކާ ވެސް ވަރަށް ބޮޑަށް ގުޅޭ ބްރޭންޑެއް ކަމަށެވެ. އަދި އާންމު ޑެއިރީ އުފެއްދުންތަކުގެ އިތުރުން ޔޯގަޓާއި ގުލާބު ޖާމު ފަދަ އާންމުން ގަޔާވާ މީރުކާ ތަކެތި ވެސް އަމުލްގެ ކުޑައިގެ ދަށުން ލިބިގެންދާނެކަން އޭނާ ފާހަގަކުރެއްވިއެވެ.
ހޮޓެލް އޭޝިއާގައި ހުންނަ އެސްޓީއޯގެ ސްޓޯލަށް ޒިޔާރަތްކުރާ ފަރާތްތަކަށް އަމުލްގެ އުފެއްދުންތަކުގެ ރަހަބަލައިލުމުގެ ފުރުޞަތު ފަހިކޮށްދީފައިވާއިރު، އަގުހުރި އިނާމުތަކެއް ލިބޭ ޕްރޮމޯޝަންތަކެއްވެސް ވަނީ ފަށާފައެވެ. އެގޮތުން ސްޓޯލްގައި ރަޖިސްޓްރީކުރާ މީހުންގެ ތެރެއިން ކޮންމެ ދުވަހަކު ގުރުއަތުން ހޮވޭ ފަރާތަކަށް ޚާއްޞަ އިނާމެއް ދިނުމާއި، އެސްޓީއޯގެ ސޯޝަލް މީޑިއާ ޕޭޖު ފޮލޯކޮށްގެން ޑިޝްވޮޝަރެއް ކާމިޔާބުކުރުމުގެ ޙަރަކާތެއް ވެސް ކުރިއަށްގެންދެއެވެ. މީގެ އިތުރުން ކޮފީސްޓޭޓްގެ މީރު ބުއިންތައް ވެސް އެ ސްޓޯލުން ލިބެން ހުންނާނެއެވެ.
މިއަހަރުގެ ހޮޓެލް އޭޝިއާ އެގްޒިބިޝަން ކުރިއަށްދާނީ މިމަހުގެ 28އިން ފެށިގެން 30ވަނަ ދުވަހުގެ ނިޔަލަށް ހުޅުމާލޭގެ ސިންތެޓިކް ޓްރެކްގައެވެ.