އިންޓަރ-ޕާލިމެންޓަރީ ޔުނިއަން (އައިޕީޔޫ)އިން އިންތިޒާމުކޮށްގެން ބާއްވާ 153ވަނަ އެސެމްބްލީގައި ދިވެހިރާއްޖެ ތަމްސީލުކުރެއްވުމުގެ މަތިވެރި މަޤްޞަދުގައި، ރައްޔިތުންގެ މަޖިލީހުގެ ރައީސް އޮނަރަބަލް ޢަބްދުއްރަޙީމް ޢަބްދުﷲ އާއި އެމަނިކުފާނުގެ އަރިހުގައި ހިމެނިވަޑައިގަންނަވާ ރާއްޖޭގެ އިސް ވަފުދެއް ޓެންޒޭނިއާގެ އަރޫޝާއަށް ފުރާވަޑައިގެންފިއެވެ.
މި ހިނގާ މަހުގެ 5ވަނަ ދުވަހުން ފެށިގެން 9ވަނަ ދުވަހުގެ ނިޔަލަށް ޓެންޒޭނިއާގައި ކުރިއަށްދާ މި ބައިނަލްއަޤުވާމީ ބައްދަލުވުމުގައި، ރައްޔިތުންގެ މަޖިލީހުގެ ރައީސް ޚާއްޞަ ތަޤުރީރެއް ދެއްވުމަށް ވަނީ އެޖެންޑާ ކުރެވިފައެވެ. އެމަނިކުފާނުގެ މި ތަޤުރީރު މައިގަނޑު ގޮތެއްގައި ބިނާކުރައް ވާނީ، މުޖުތަމަޢުގެ އެންމެހާ ފަރާތްތަކަށް ހަމަހަމަ ފުރުޞަތުތަކެއް ފަހިކޮށްދީ، އިތުބާރު ޤާއިމުކުރުމާ އެކު ހެޔޮވެރިކަމުގެ ނިޒާމު ހަރުދަނާކޮށް ރައްޔިތުން ބާރުވެރިކުރުވުމުގެ މައްޗަށެވެ.
ރައްޔިތުންގެ މަޖިލީހުގެ އިދާރާއިން ހާމަކޮށްފައިވާ ގޮތުގައި، ރައީސް ޢަބްދުއްރަޙީމްގެ އަރިހުގައި މަޖިލީހުގެ ބައެއް މެންބަރުންނާއި އިސް އޮފިޝަލުން މި ދަތުރުފުޅުގައި ބައިވެރިވެވަޑައިގަންނަވައެވެ. އެގޮތުން، މި ވަފުދުގައި މަޖިލީހުގެ ކައުންސެލް ޖެނެރަލް އަލްއުސްތާޛާ ފާޠިމަތު ފިލްޒާ އާއި، ޗީފް އޮފް ބިއުރޯ އަޙްމަދު ނިހާން ޙުސައިން މަނިކުގެ އިތުރުން ފޮރިން ރިލޭޝަންސް ޑިޕާޓްމަންޓްގެ އެސިސްޓެންޓް ޑިރެކްޓަރ ޖެނެރަލް ޒުއްޔިނާ ބަދުރީ ވެސް ހިމެނިވަޑައިގަންނަވާ ކަމަށް އެ އިދާރާއިން މަޢުލޫމާތުދެއެވެ.