އަންނަ އަހަރުން ފެށިގެން ދިވެހި ޤައުމީ ފުޓްސަލް ޓީމުގެ ކުޅުންތެރިންނަށް މުސާރަ ހަމަޖެއްސުމުގެ މަސައްކަތް ކުރިއަށްދާކަން ޒުވާނުން ބާރުވެރިކުރުވުމާއި ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު އިޢުލާނުކުރައްވައިފިއެވެ.
ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި، ފުޓްސަލް ކުޅުންތެރިންނާއި އެ ކުޅިވަރުގެ އާއިލާއިން ކުރަމުންދާ އާދޭސްތަކަށް ނިމުމެއް ގެނެސްދިނުމުގެ ގޮތުން، މިހާރު ޢަމަލުކުރަމުންދާ އުސޫލުތަކާ މެދު ގިނަ ބައެއްގެ ނުތަނަވަސްކަމާއި ޝަކުވާތައް ހުރިކަން ފާހަގަކުރައްވަމުން، ވަޒީރު ވިދާޅުވީ އެ ކަންކަން އިސްލާޙުކޮށް އާ އޮނިގަނޑެއް އެކުލަވާލުމުގެ މަސައްކަތް މިހާރު ފެށިފައިވާ ކަމަށެވެ. އަދި މި ބަދަލާ އެކު، ކުރިއަށް އޮތް އަހަރުގެ ދައުލަތުގެ ބަޖެޓުގައި ފުޓްސަލް ކުޅުންތެރިންގެ އުޖޫރައަށް ބޭނުންވާ ފައިސާ ހިމެނުމަށް މަސައްކަތްކުރައްވާނެ ކަމުގެ ޔަޤީންކަން އެމަނިކުފާނު ވަނީ ދެއްވާފައެވެ.
ޤައުމީ ފެންވަރުގައި ތަމްސީލުކުރާ އެއްވެސް ކުޅިވަރެއްގެ އެތުލީޓުންނަށް އިނާޔަތްތައް ހަމަޖައްސައިދެވޭނީ އެކަމަށް ކަނޑައެޅިފައިވާ ޚާއްޞަ މިންގަނޑުތަކެއްގެ ތެރެއިންކަން ރާފިޢު ވަނީ ތަފްޞީލުކޮށްދެއްވާފައެވެ. އެގޮތުން، މުސާރަ ދިނުމުގެ ކުރިން ޤައުމީ ފެންވަރުގެ މުބާރާތްތަކެއް އެ ކުޅިވަރެއްގައި ބޭއްވުން ލާޒިމުވާއިރު، ފުޓްސަލްއަށް އޭގެ ޙައްޤު މަޤާމު ހޯދައިދިނުމަށްޓަކައި މިހާރު ކުރިއަށްދަނީ އެ ނިޒާމު ތަރުތީބުކުރުމުގެ މަރުޙަލާ ކަމުގައި ވެސް ވަޒީރު ވިދާޅުވިއެވެ.
ރާއްޖޭގެ ޒުވާނުންގެ މެދުގައި އެންމެ ފޯރިގަދަ ކުޅިވަރުގެ ގޮތުގައި ފުޓްސަލް ފާހަގަކުރެވެމުންދާއިރު، އަތޮޅުތަކާއި ރަށްރަށުގެ ފެންވަރުގައި އަހަރަކު އެތައް މުބާރާތެއް އަންނަނީ ބާއްވަމުންނެވެ. މި ކުޅިވަރަށް ދެވޭ ސަމާލުކަން އިތުރަށް ބޮޑުވެގެންދިޔައީ، ދާދިފަހުން ބޭއްވުނު ފުރަތަމަ ސާފް ފުޓްސަލް ޗެމްޕިއަންޝިޕްގެ ފިރިހެން ޑިވިޝަނުގެ ތަށި ރާއްޖޭގެ ޤައުމީ ޓީމުން ކާމިޔާބުކޮށް، ތާރީޚީ ޝަރަފެއް ޤައުމަށް ހޯދައިދިނުމާ ގުޅިގެންނެވެ.