އުމްރާނީ ގޮތުންނާއި ކުޅުންތެރިންގެ ފެންވަރު މަތިކުރުމުގައި ފާއިތުވި ސަރުކާރުތަކާ އަޅާނުކިޔޭ ވަރުގެ ބޮޑެތި ކުރިއެރުންތަކެއް މި ވެރިކަމުގެ ކުރު މުއްދަތެއްގެ ތެރޭގައި ހޯދައިފިކަމަށް، ޒުވާނުން ބާރުވެރިކުރުމާއި، ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.
އެމްއެމްޓީވީއަށް ދެއްވި ބަސްދީގަތުމެއްގައި ވާހަކަފުޅުދައްކަވަމުން މިނިސްޓަރު ފާހަގަކުރެއްވި ގޮތުގައި، މި ސަރުކާރުގެ މަސައްކަތުގެ ދުވެލި ވަރަށް ހަލުއްވެވެ. އެގޮތުން، ނިމިދިޔަ އެމްޑީޕީގެ ފަސް އަހަރުގެ ވެރިކަމުގައި ކުޅިވަރާ ގުޅޭގޮތުން ނިންމާލެވިފައި ވަނީ ގާތްގަނޑަކަށް 184 މަޝްރޫޢު ނަމަވެސް، މި ވެރިކަމަށް އަދި ދެ އަހަރު ނުވަނީސް 200 އަށްވުރެ ގިނަ ޕްރޮޖެކްޓްގެ މަސައްކަތް މިހާރު ވަނީ އެއްކޮށް ފުރިހަމަކޮށްފައެވެ.
މީގެ އިތުރުން، ކުޅިވަރާ ބެހޭ ޤާނޫނަށް މުހިންމު އިޞްލާޙުތަކެއް ގެނެސް ރައީސުލްޖުމްހޫރިއްޔާ އެ ބިލު ތަޞްދީޤުކުރައްވާފައިވުމާއި، ދުރު ރާސްތާއަށް އަމާޒުކޮށްގެން ޚާއްޞަ ޕްލޭނެއް އެކުލަވާލެވިފައިވާކަން ރާފިޢު އިއުލާނުކުރެއްވިއެވެ. ހަމައެހެންމެ، ވޭތުވެދިޔަ ފަނަރަވަރަކަށް އަހަރު ދުވަހު ގައުމީ ފެންވަރުގެ އެތުލީޓުން ކުރަމުން އައި އާދޭސްތަކަށް ނިމުމެއް ގެނެސް، އެ ފަރާތްތަކުގެ މުސާރަ ބޮޑުކޮށްދިނުމުގެ އިތުރުން ހެލްތު އިންޝުއަރެންސްގެ ނިޒާމު ރައީސް ޑރ. މުޙައްމަދު މުޢިއްޒުގެ އިސްނެންގެވުމުގެ މަތިން ހަމަޖައްސައިދިނުމަކީ މި ސަރުކާރުގެ ވަރަށް ބޮޑު ކާމިޔާބީއެއްގެ ގޮތުގައި އޭނާ ސިފަކުރެއްވިއެވެ.
އަތޮޅުތެރޭގެ އެކި ރަށްރަށުގައި ބައިނަލްއަޤްވާމީ ފެންވަރުގެ މަލްޓި ސްޕޯޓްސް ކޮމްޕްލެކްސްތައް ބިނާކުރުމުގެ އަމަލީ މަސައްކަތްތައް ފެށިފައިވާއިރު، މިކަމުގެ ސަބަބުން ކުރިމަގުގައި ބޮޑެތި މުބާރާތްތައް ރާއްޖޭގައި ބޭއްވުމުގެ މަގު ފަހިވެގެންދާނެކަމަށް ވެސް މިނިސްޓަރު ވިދާޅުވިއެވެ.
މިފަދަ ހަރުދަނާ ސިޔާސަތުތަކުގެ ނަތީޖާއެއްގެ ގޮތުން ދިވެހި އެތުލީޓުންގެ ފެންވަރު ރަނގަޅުވަމުން އަންނަކަން ފާހަގަކުރައްވައި ރާފިޢު ވިދާޅުވީ، 2024ވަނަ އަހަރު ތާރީޚުގައި ފުރަތަމަ ފަހަރަށް ދިވެއްސަކު އޮލިމްޕިކްސް ގޭމްސްއަށް ކޮލިފައިވުމާއި، އޭޝިއަން ގޭމްސްގައި ރާއްޖޭގެ ހަތަރު ރާޅާއެޅުންތެރިން ވާދަކުރުމުގެ ފުރުސަތު ހޯދުމަކީ މުޅި ގައުމަށް ލިބުނު ވަރަށް ބޮޑު ފަޚުރެއް ކަމަށެވެ.