މީސްމީޑިއާގައި ދައުރުވަމުންދާ، އިނގުރައިދޫ ދާއިރާގެ މެންބަރު އިބްރާހީމް ފަލާހުގެ އަތުން 17 މިލިއަން ރުފިޔާއަށް އެމްޑަބްލިއުއެސްސީން ލޭންޑިން ކްރާފްޓެއް ގަތްކަމަށް ބުނާ ތުހުމަތުތަކަކީ އެއްވެސް ހަގީގަތެއް ނެތް ދޮގު ވާހަކަތަކެއްކަމަށް އެ ކުންފުނީގެ މެނޭޖިން ޑިރެކްޓަރު ހުސައިން ފަހުމީ ވިދާޅުވެއްޖެއެވެ.
ފަހުމީ މިހެން ވިދާޅުވެފައި ވަނީ، ނުވަ ލައްކަ ރުފިޔާގެ އަގުހުރި ބައު އުޅަނދެއް އާދަޔާ ހިލާފު ބޮޑު އަގެއްގައި ގަނެ، އެ މަރާމާތުކުރުމަށް އިތުރު ފައިސާތަކެއް ހޭދަކޮށްފައިވާކަމަށާއި، އަދި އިތުރު އުޅަނދެއް ހޯދުމުގެ މަސައްކަތް ވެސް ކުރަމުންދާކަމަށް ބުނެ އާންމުންގެ މެދުގައި ފެތުރިފައިވާ އަޑުތަކާ ގުޅިގެންނެވެ. އޭނާ ވިދާޅުވި ގޮތުގައި، ނިމިދިޔަ 2023ވަނަ އަހަރުން ފެށިގެން މިއަދާ ހަމައަށް ވެސް އެފަދަ އެއްވެސް މުއާމަލާތެއް ކުންފުނިން ކޮށްފައެއް ނުވާނެއެވެ. އަދި ބޯޑުގެ ރުހުމެއް ނުވަތަ އެފަދަ ކަމަކާ ގުޅޭ އެއްވެސް މަޝްވަރާއެއް ވެސް ކުރިއަށް ގެންގޮސްފައި ނުވާނެކަން އޭނާ ކަށަވަރުކޮށްދެއްވިއެވެ.
މީގެ އިތުރުން، މި މައްސަލައާ ގުޅިގެން ކުންފުނީގެ ޑިރެކްޓަރުންގެ ބޯޑުގެ މެންބަރަކު މަގާމުން އިސްތިއުފާދެއްވި ކަމަށް ފަތުރަމުންދާ ހަބަރުތަކަށް ވެސް ފަހުމީ ވަނީ ރައްދުދެއްވާފައެވެ. އެގޮތުން، އެ މެންބަރު މަގާމުން ވަކިވެވަޑައިގަތީ ސީދާ އަމިއްލަ ސަބަބުތަކަކާ ގުޅިގެން ކަމަށާއި، އެއީ މި ތުހުމަތުތަކާ އެއްވެސް ގުޅުމެއް އޮވެގެން ހިނގި ކަމެއް ނޫންކަން އޭނާ ސާފުކޮށްދެއްވިއެވެ.
އެމްޑަބްލިއުއެސްސީގެ ހިންގުން އަބަދުވެސް ބިނާވެފައި އޮންނާނީ ހާމަކަން ބޮޑު އަދި ޒިންމާދާރު އުސޫލުތަކެއްގެ މައްޗަށްކަން ފާހަގަކުރައްވަމުން، އެއްވެސް އަސާސެއް އަދި ހެއްކެއް ނެތް ގޮތަށް މިފަދަ ދޮގު މައުލޫމާތު ނުފެތުރުމަށް ފަހުމީ ވަނީ އިލްތިމާސްކުރައްވާފައެވެ. ފާހަގަކޮށްލެވޭ ގޮތުގައި، ސޯޝަލް މީޑިއާގައި މި ތުހުމަތުތައް ފަތުރަމުންދާ ފަރާތްތަކަށް ވެސް މިކަން ސާބިތުކޮށްދެވޭނެ އެއްވެސް ކިތާބީ ހެއްކެއް މިހާތަނަށް ދެއްކިފައެއް ނުވެއެވެ.