“ބިންވެރިޔާ” ސްކީމްގެ ދަށުން ހުޅުމާލޭގެ ތިންވަނަ ފިޔަވަހިން ދޫކުރަން ކަނޑައަޅާފައިވާ ގޯތިތަކުގެ ތެރެއިން ބޮޑު ބައެއްގެ ރަޖިސްޓްރީގެ ކަންކަން ނިންމައި ވެރިފަރާތްތަކާ ހަވާލުކޮށްފައިވާ ކަމަށް ބިނާރާއި ގެދޮރުވެރިކަމާއި އުމްރާނީ ތަރައްޤީއާ ބެހޭ ވުޒާރާއިން މިއަދު ހާމަކޮށްފިއެވެ.
އެ މިނިސްޓްރީން އާންމުކުރި އެންމެ ފަހުގެ ތަފާސްހިސާބުތަކަށް ބަލާއިރު، ފޭސް ތިނަކުން ޖުމްލަ 698 ގޯތި ދޫކުރުމަށް ވަނީ ނިންމާފައެވެ. އޭގެ ތެރެއިން 641 ބިމެއްގެ ރަޖިސްޓްރީ މިހާތަނަށް ދޫކޮށްފައިވާއިރު، މިއީ ޖުމްލަ އަދަދުގެ ގާތްގަނޑަކަށް 92 އިންސައްތައެވެ. އަދި އަމަލީ ގޮތުން 603 ގޯއްޗެއް (86 އިންސައްތަ) މިހާރު ވަނީ އޭގެ ހައްގުވެރިންނާ ހަވާލުކޮށް ނިންމާފައެވެ.
ބިންތައް ހަވާލުކުރުމުގެ އުސޫލާ ގުޅޭގޮތުން މިނިސްޓްރީން ބުނެފައިވަނީ، ރަޖިސްޓްރީ ލިބުމަށް ފަހު އެ ސަރަހައްދެއް ސާފުކޮށް، އިންވަކިކުރުމުގެ މަސައްކަތް ނިމުމުން، ބިމާ ހަވާލުވުމަށް އައުމަށް ގޯތީގެ ވެރިފަރާތްތަކަށް ރަސްމީކޮށް އަންގަމުން ގެންދާނެ ކަމަށެވެ.
ތިންވަނަ ފިޔަވަހި ހިއްކުމުގެ މަޝްރޫއު އެންމެ ފުރަތަމަ ފެށީ ސެޕްޓެމްބަރު 2023ގައި ކުރީގެ ރައީސް އިބްރާހިމް މުޙައްމަދު ޞާލިޙްގެ ވެރިކަމުގައެވެ. އެ ފަހަރު 24 ހެކްޓަރު ހިއްކުމަށް ފަހު މަސައްކަތް މަޑުޖެހިފައި އޮތުމާ ގުޅިގެން، އަލުން އެ މަޝްރޫއު ފަށައި ބާކީ 38 ހެކްޓަރު ހިއްކީ މިދިޔަ އަހަރުގެ ނޮވެމްބަރު މަހުގެ ތެރޭގައެވެ. ކެޕިޓަލް މެރިން އެންޑް ސިވިލް ކޮންސްޓްރަކްޝަން (ސީއެމްސީ)އާ ހަވާލުކޮށްގެން ކުރިއަށްގެންދިޔަ މި މަޝްރޫއުގެ ދަށުން ޖުމްލަ 63 ހެކްޓަރުގެ ބިން ވަނީ އިތުރުކޮށްފައެވެ. ބިން ހިއްކުމުގެ މުޅި މަޝްރޫއު އެއްކޮށް ނިމިއްޖެކަން މިދިޔަ ޖަނަވަރީ 25ވަނަ ދުވަހު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިއުލާނުކުރެއްވިއިރު، ގޯތިތައް ހަވާލުކުރަން ފަށާފައި ވަނީ މާރިޗު މަހުގެ ތެރޭގައެވެ.