ދިވެހި ޤައުމުގެ ތަރައްޤީގެ އެކި މަޝްރޫޢުތަކަށް ސަޢުދީ ސަރުކާރުގެ ފުރިހަމަ އެހީތެރިކަން މެދުކެނޑުމެއްނެތި ލިބެމުންދާނެކަމުގެ ޔަޤީންކަން ދިވެހިރާއްޖެއަށް އައްޔަންކުރައްވާފައި ހުންނަވާ ސަފީރު ޔަޙްޔާ ޙަސަން އަލްޤަޙްޠާނީ ދެއްވައިފިއެވެ.
ސަޢުދީ ޢަރަބިއްޔާގެ 96ވަނަ ޤައުމީ ދުވަސް ފާހަގަކުރުމަށްޓަކައި ރާއްޖޭގައި ހުންނަ އެ ޤައުމުގެ އެމްބަސީން ރޭ ބޭއްވި ޚާއްޞަ ރަސްމިއްޔާތުގައި ސަފީރުގެ ތަޤުރީރު ދެއްވަމުން ދެ ޤައުމުގެ ދެމެދުގައި އުފެދިފައިވާ ޒަމާންވީ އަޚުވަންތަކަމުގެ ގުޅުމަށް އަލިއަޅުއްވާލައްވަމުން، ވޭތުވެދިޔަ އަހަރުތަކުގައި ރާއްޖެއަށް އައިސްފައިވާ ހެޔޮ ބަދަލުތަކުގައި ސަޢުދީގެ ދައުރު ވަރަށް ބޮޑުކަން ފާހަގަކުރެއްވިއެވެ. މިގޮތުން، 1978ވަނަ އަހަރުން ފެށިގެން ސަޢުދީ ފަންޑު ފޯ ޑިވެލޮޕްމަންޓް (އެސްއެފްޑީ) މެދުވެރިކޮށް ރާއްޖޭގެ ތަފާތު ދާއިރާތަކަށް 488 މިލިއަން އެމެރިކާ ޑޮލަރުގެ މާލީ އެހީތެރިކަން ފޯރުކޮށްދީފައިވާކަން އެމަނިކުފާނު ހާމަކުރެއްވިއެވެ. މީގެ ތެރޭގައި ސިއްޙީ ދާއިރާއާއި، ބޯހިޔާވަހިކަމާއި، މަސްވެރިކަމުގެ އިތުރުން ދަތުރުފަތުރުގެ ނިޒާމު ހަރުދަނާކުރުމަށް ހިންގިފައިވާ ގިނަގުނަ މަސައްކަތްތައް ހިމެނެއެވެ.
ކުރިމަގުގެ އަމާޒުތަކާ ގުޅޭގޮތުން ވާހަކަފުޅުދައްކަވަމުން އަލްޤަޙްޠާނީ ވަނީ، “ސަޢުދީ ވިޝަން 2030″ގެ ތަސައްވުރުގެ ތެރެއިން ބޭރުގެ އިންވެސްޓްމަންޓްތައް ފުޅާކުރުމަށް އެ ޤައުމުން ޚާއްޞަ އިސްކަމެއް ދޭކަން ބަޔާންކުރައްވާފައެވެ. އަދި ފަތުރުވެރިކަމާއި ޒަމާނީ ޓެކްނޮލޮޖީ ފަދަ މުހިންމު ދާއިރާތަކުން ރާއްޖޭގައި ސަޢުދީގެ އިންވެސްޓަރުންގެ ހިއްސާ އިތުރުވެގެން ދިއުމަކީ އެމަނިކުފާނު ވަރަށް ބޮޑަށް އެދިވަޑައިގަންނަވާ ކަމެއްކަމުގައި ވިދާޅުވިއެވެ.
ސަޢުދީ ޢަރަބިއްޔާގެ ޤައުމީ ދުވަހުގެ މި ކުލަގަދަ ޙަފުލާގައި ރާއްޖޭގެ ރައީސުލްޖުމްހޫރިއްޔާގެ ދެކަނބަލުން ބައިވެރިވެވަޑައިގަތުމަކީ، ދިވެހި ސަރުކާރުން ސަޢުދީއާ އެކު ބާއްވާ ގާތް ގުޅުމަށް ދޭ އަހައްމިއްޔަތުކަން ރަމްޒުކޮށްދޭ ކަމެއްކަން ފާހަގަކުރައްވައި، ސަފީރު ވަނީ އެ ބޭފުޅުންނަށް ވަރަށް ޚާއްޞަ ޝުކުރެއް އަދާކުރައްވާފައެވެ.