ބަލިމީހާގެ ޙާލަތަށާއި އެހެނިހެން ކަންކަމަށް ރިޢާޔަތްކުރުމަށް ފަހު އާސަންދަ ސްކީމްގެ ތެރެއިން ރާއްޖެއިން ބޭރަށް ބަލިމީހުން ފޮނުވުމަކީ އަލަށް ފެށި ކަމެއް ނޫންކަމަށް، އެ ކުންފުނީގެ މެނޭޖިންގ ޑިރެކްޓަރ އާމިނަތު ޒީނިޔާ ވިދާޅުވެއްޖެއެވެ.
ދައުލަތުގެ މީޑިއާ، ޕީއެސްއެމްގެ ޕްރޮގްރާމެއްގައި ވާހަކަދައްކަވަމުން ޒީނިޔާ ވިދާޅުވީ، އާސަންދަ ހިންގުމުގެ ގަވާއިދަށް ދާދިފަހުން ގެނައި ބަދަލުތަކާ ގުޅިގެން އުފެދިފައިވާ ސުވާލުތަކަށް ޖަވާބުދެއްވަމުންނެވެ. އަލަށް އާންމުކުރި ގަވާއިދުގައި ބަޔާންކޮށްފައިވާ ގޮތުން، ރާއްޖޭގައި ކުރެވެން ހުންނަ ފަރުވާތައް ހޯދުމުގައި ދިމާވާ ދަތިތަކާއި، ބަލިމީހާއަށް ފަރުވާ ދިނުމަށް ހޭދަވާ މުއްދަތަށް ބަލައި ބޭރަށް ފޮނުވުމުގެ ފުރުޞަތު ފަހިކޮށްދީފައިވެއެވެ. ޒީނިޔާ ފާހަގަކުރެއްވި ގޮތުގައި، މިއީ ކުރިންވެސް ވަކި އުޞޫލުތަކެއްގެ ތެރެއިން އެ ކުންފުނިން ޢަމަލުކުރަމުން އައި ގޮތެވެ.
މި ކަން އިތުރަށް ސާފުކޮށްދެއްވަމުން އޭނާ މިސާލެއްގެ ގޮތުގައި ނެންގެވީ މައިބަދައިގެ އޮޕަރޭޝަންތަކެވެ. އެގޮތުން، ރާއްޖޭގައި ކުރާ އޮޕަރޭޝަންތައް ކާމިޔާބުނުވެ ތަކުރާރުކޮށް ހަދަންޖެހޭ ފަދަ ޚާއްޞަ ޙާލަތްތަކުގައި، ޑޮކްޓަރުންގެ ލަފާގެ މަތިން ބަލިމީހުން ބޭރަށް ފޮނުވައިދޭކަމަށް ވިދާޅުވިއެވެ. މީގެ އިތުރުން، ރާއްޖޭގައި ހެދެން ހުރި ބޮޑެތި ސާޖަރީތައް ކުރުމަށްޓަކައި ދިގު މުއްދަތަކަށް އިންތިޒާރުކުރަން ޖެހޭނަމަ ނުވަތަ ފަރުވާއަށް ހިނގާ ޚަރަދުގައި ބޮޑު ތަފާތެއް އުޅޭނަމަ، ބަލިމީހާގެ ފައިދާއަށްޓަކައި ރާއްޖެއިން ބޭރަށް ފޮނުވުމުގެ އިންތިޒާމު އާސަންދައިން ހަމަޖައްސައިދޭނެކަން ވަނީ ކަށަވަރުކޮށްދެއްވާފައެވެ.
ޞިއްޙީ ވުޒާރާއިން މަޢުލޫމާތު ދީފައިވާ ގޮތުގައި، ކުރިން އެންސްޕާގެ ‘މެޑިކަލް ވެލްފެއަރ ސްކީމް’ މެދުވެރިކޮށް ފޯރުކޮށްދެމުން އައި 16 ޚިދުމަތެއް މިހާރު ވަނީ ސީދާ އާސަންދައިގެ ދަށަށް ގެނެސްފައެވެ. މި ބަދަލާ އެކު، ބޭސްފަރުވާއަށް އެދި ހުށަހެޅުން “މައި އާސަންދަ” ޕޯޓަލްއަށް ބަދަލުކުރެވި، ރައްޔިތުންނަށް ލިބޭ ޚިދުމަތް އިތުރަށް ހަލުވިވެގެންދާނެ ކަމަށް އެ ކުންފުނިން އުންމީދުކުރެއެވެ. ދައުލަތުގެ ބަޖެޓުން އެންމެ ބޮޑު ހޭދައެއް ކުރަމުން އަންނަ އާސަންދަ ސްކީމްގެ ޚިދުމަތުގެ ފެންވަރާމެދު ޢާންމުންގެ މެދުގައި އަބަދުވެސް ކަންބޮޑުވުންތަކެއް ހުރެއެވެ.