ރާއްޖޭގެ ޤައުމީ ޕޭމަންޓް ސިސްޓަމް ކަމަށްވާ “ފަވަރަ” އާއި އިންޑިއާގެ “ޔޫޕީއައި” ނިޒާމު ގުޅާލައި، ދިވެހިރާއްޖެއިން އިންޑިއާއަށް ހިނދުކޮޅެއްގެ ތެރޭގައި ފައިސާ ޓްރާންސްފަރ ކުރެވޭނެ އައު ޚިދުމަތް ރަސްމީކޮށް ފަށައިފިއެވެ.
މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގައި މިއަދު ބޭއްވި ޚާއްސަ ރަސްމިއްޔާތެއްގައި، މި އައު ނިޒާމު އިފްތިތާޙުކޮށްދެއްވީ އެމްއެމްއޭގެ ގަވަރުނަރު އަޙުމަދު މުނައްވަރެވެ. މި ޙަފްލާގައި ޚާރިޖީ ވަޒީރު އިރުތިޝާމް އާދަމް އާއި އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ޖީ ބާލަސުބްރަމާނިއަން ބައިވެރިވެވަޑައިގަތެވެ. ފުރަތަމަ މަރުޙަލާގައި މި ޚިދުމަތް ފޯރުކޮށްދިނުމަށް ހަމަޖެހިފައި ވަނީ ބޭންކް އޮފް މޯލްޑިވްސް (ބީއެމްއެލް)އަދި މޯލްޑިވްސް އިސްލާމިކް ބޭންކް (އެމްއައިބީ)އިންނެވެ.
މި ބަދަލާ އެކު، ބީއެމްއެލް އާއި އެމްއައިބީގެ ކަސްޓަމަރުންނަށް އިތުރު އެހެން އެޕްލިކޭޝަނެއް ޑައުންލޯޑް ކުރުމުގެ ބަދަލުގައި، އެ ބޭންކެއްގެ އިންޓަނެޓް ބޭންކިންގް ނުވަތަ މޮބައިލް އެޕް މެދުވެރިކޮށް ސީދާ އިންޑިއާގެ ޔޫޕީއައި އެކައުންޓުތަކަށް ފައިސާ ޖަމާކުރެވޭނެއެވެ. ޑޮލަރުން ނުވަތަ ރުފިޔާއިން ޕޭމަންޓް ހެދި ނަމަވެސް، ފައިސާ ލިބޭ ފަރާތަށް އެ ވަންނާނީ އިންޑިއަން ރުޕީސްއިންނެވެ. މީގެ އިތުރުން ފައިސާ ފޮނުވުމުގެ ކުރިން ނެގޭނެ ފީތަކާއި، އެކްސްޗޭންޖް ރޭޓް އަދި ފައިސާ ލިބޭ މީހާގެ މަޢުލޫމާތުތައް ކަށަވަރުކުރުމުގެ ފުރުޞަތު ކަސްޓަމަރުންނަށް ލިބިގެންދާނެއެވެ.
ދިވެހިރާއްޖެ ވެގެން މިދިޔައީ އިންޑިއާގެ ޔޫޕީއައި ނިޒާމާ އަމިއްލަ ޕޭމަންޓް ވިއުގައެއް ގުޅާލި މަދު ޤައުމުތަކުގެ ތެރެއިން އެއް ޤައުމަށެވެ. މީގެ ކުރިން މިފަދައިން ޔޫޕީއައިއާ ގުޅާލާފައި ވަނީ ހަމައެކަނި ނޭޕާލް އަދި ސިންގަޕޫރުންނެވެ. މިއީ ޖުލައި 2025ގައި އެމްއެމްއޭ އަދި އިންޑިއާގެ އެންޕީސީއައި އިންޓަނޭޝަނަލް ޕޭމަންޓްސް ލިމިޓެޑް (އެންއައިޕީއެލް)އާ ދެމެދު ސޮއިކުރެވުނު އެއްބަސްވުމެއްގެ ދަށުން، ރިޒާވް ބޭންކް އޮފް އިންޑިއާ އާއި ޕޭމަންޓް މޯލްޑިވްސް ގުޅިގެން ހިންގި ބޮޑު މަޝްރޫޢެކެވެ.
މިހާރު ތަޢާރަފުކުރެވުނީ އާންމު ފަރުދުންގެ މެދުގައި ފައިސާ ފޮނުވޭ “ޕަރސަން ޓު ޕަރސަން” މަރުޙަލާއެވެ. ނަމަވެސް، ކިއުއާރް ކޯޑު މެދުވެރިކޮށް ވިޔަފާރިތަކަށް ފައިސާ ދެއްކޭނެ ގޮތް ހެދުމުގެ މަޝްވަރާތައް މިހާރު ދަނީ ކުރިއަށެވެ. އެމްއެމްއޭއިން ހާމަކުރި ގޮތުގައި، މިވަގުތު ހަމައެކަނި ރާއްޖެއިން އިންޑިއާއަށް ފައިސާ ފޮނުވުނު ނަމަވެސް، އިންޑިއާއިން ރާއްޖެއަށް ފައިސާ ލިބޭނެ އިންތިޒާމުތައް ހަމަޖެއްސުމުގެ ޓެސްޓުތައް ވަރަށް އަވަހަށް ފެށިގެންދާނެއެވެ.