ރާއްޖެއަށް ބޭނުންވާ ބޭރުގެ އިންވެސްޓްމަންޓްތައް އިތުރުކުރުމާއި ދެ ގައުމުގެ މެދުގައި އޮންނަ ވިޔަފާރީގެ ގުޅުންތައް އައު ހަރުފަތަކަށް ގެންދިއުމުގެ މަގުސަދުގައި، ދިވެހިރާއްޖޭގެ މާލީ ވަޒީރު ހަސަން ޒަރީރު ޤަތަރުގެ ވެރިރަށް ދޯހާގައި އެ ގައުމުގެ މާލީ ވަޒީރު ޢަލީ ބިން އަޙްމަދު އަލް ކުވާރީއާ ބައްދަލުކުރައްވައި ރަސްމީ މަޝްވަރާތަކެއް ކުރިއަށް ގެންދަވައިފިއެވެ.
މާލީ ވަޒީރު ޤަތަރަށް މިހާރު ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން ބޭއްވެވި މި މަތީ ފަންތީގެ ބައްދަލުވުމުގައި މައިގަނޑު ގޮތެއްގައި އަލިއަޅުވާލައްވާފައި ވަނީ، ދިވެހި އިޤްތިސާދު ކުރިއެރުވުމުގައި އަމިއްލަ ވިޔަފާރިވެރިންގެ ހިއްސާ ބޮޑުކުރެވިދާނެ ގޮތްތަކާއި އެކަމަށް ހުޅުވިފައިވާ ފުރުސަތުތަކުގެ މައްޗަށެވެ. މީގެ އިތުރުން، އެއް ގައުމުން އަނެއް ގައުމަށް ކުރާ އިންވެސްޓްމަންޓްތައް ފުޅާކުރުމަށް މަގުފަހިކޮށްދެވިދާނެ އުސޫލުތަކާއި، އިޤްތިސާދީ ގޮތުން ދެފަރާތަށް ވެސް ފައިދާހުރި އައު ދާއިރާތަކުން ގުޅިގެން މަސައްކަތްކުރުމާ މެދު ދެ ވަޒީރުން ވަނީ ފުޅާ ދާއިރާއެއްގައި ޚިޔާލު ބަދަލުކުރައްވާފައެވެ.
ދެ ޤައުމުގެ ދެމެދުގައި ޒަމާނުއްސުރެ އޮންނަ އަހުވަންތަކަމުގެ ގާތް ގުޅުމުގެ މައްޗަށް ބިނާކޮށް، ދެމެހެއްޓެނިވި ތަރައްޤީއަށް އަމާޒުކޮށްގެން އެކުގައި މަސައްކަތްކުރުމުގެ މުހިންމުކަން ވެސް މި ބައްދަލުވުމުގައި ވަނީ ފާހަގަކުރައްވާފައެވެ. ޤަތަރަކީ ރާއްޖޭގެ އުމްރާނީ އަދި އިޤްތިސާދީ ތަރައްޤީގައި އަބަދުވެސް ވަރަށް މުހިންމު ހިއްސާއެއް ވަމުން އަންނަ ގައުމެކެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ ޚާރިޖީ ސިޔާސަތުގެ ދަށުން އެންމެ ބޮޑު އިސްކަމެއް ދެއްވާ އެއް ކަމަކީ، ބައިނަލްއަޤްވާމީ މައިދާނުގައި ރާއްޖޭގެ އެކުވެރި ޤައުމުތަކާ އެކު އިޤްތިސާދީ ގުޅުންތައް ވަރުގަދަކޮށް، ބޭރުގެ އިންވެސްޓަރުންނަށް ރާއްޖޭގައި ފަސޭހަ އަދި ރައްކާތެރި މާޙައުލެއް ޤާއިމުކޮށްދިނުމެވެ.