ސަރުކާރުގެ އެންމެ ބޮޑު ބޯހިޔާވަހިކަމުގެ މަޝްރޫއު ކަމަށްވާ ރަސްމާލެއިން ޔޫއޭއީގެ ކުންފުންޏަކަށް ބިމެއް ދޭން އުޅޭކަމަށް އިދިކޮޅު ފަރާތްތަކުން ފަތުރަމުންދާ އަޑުތައް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މުޅިން ދޮގުކުރައްވައިފިއެވެ.
ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި، ޕާލް ރެސިޑެންސްގެ ނަމުގައި ހިންގަން އުޅޭކަމަށް ބުނާ ޕްރޮގްރާމަކީ އެއްވެސް އަސާސެއް ނެތް ވާހަކައެއްކަން ފާހަގަކުރައްވަމުން، ރައީސް ވިދާޅުވީ އެފަދަ ކަމަކަށް ރަސްމާލޭގެ އެއްވެސް ސަރަހައްދަކުން ޖާގަ ދިނުމަށް ސަރުކާރުން ނިންމާފައި ނުވާކަމަށާއި، އެއީ ހަގީގަތާ ހިލާފު ދޮގު ވާހަކަތަކެއް ކަމަށެވެ.
މީގެ އިތުރުން، ރާއްޖޭގެ އުމްރާނީ ތަރައްގީއަށް ފައިސާ ހޯދުމުގެ ބޭނުމުގައި ގާއިމުކޮށްފައިވާ ސައްތައިންސައްތަ ދިވެހި ސަރުކާރުގެ ހިއްސާ އޮންނަ ޑިވެލޮޕްމަންޓް ބޭންކް އޮފް މޯލްޑިވްސް (ޑީބީއެމް)ގެ ހިއްސާތަކެއް އެމެރިކާގެ ބޮޑު އިންވެސްޓްމަންޓް ބޭންކެއް ކަމަށްވާ ޖޭޕީމޯގަން އަށް ވިއްކާލަން އުޅޭކަމަށް ދެކެވޭ ވާހަކަތަކަކީ ވެސް ކަނޑައެޅިގެން ދޮގެއްކަމުގައި ރައީސް ސާފުކޮށްދެއްވިއެވެ. އެ ބޭންކުގެ ހިދުމަތްތައް ފެށުމަށްޓަކައި ކުރަންޖެހޭ އެތެރޭގެ އިދާރީ މަސައްކަތްތައް ވަރަށް ހަލުވި ދުވެއްޔެއްގައި ކުރިއަށްދާކަމަށް ސަރުކާރުން މައުލޫމާތުދެއެވެ.
ރާއްޖެއަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯދައިދިނުމަށްޓަކައި ކ. ފުށިދިއްގަރުފަޅު ހިއްކައިގެން ތަރައްގީކުރާ ރަސްމާލެއަކީ ރައީސް މުއިއްޒުގެ ސަރުކާރުގެ އެންމެ ބިޔަ މަޝްރޫއެވެ. 2023ވަނަ އަހަރުގެ ޑިސެމްބަރު މަހު އަމަލީ މަސައްކަތް ފަށާފައިވާ މި މަޝްރޫއުގެ ދަށުން ޖުމްލަ 1،153 ހެކްޓަރުގެ ބިން ހިއްކުމަށް ވަނީ ކަނޑައަޅާފައެވެ.
ރަސްމާލެ ހިއްކުމުގެ މަސައްކަތް އަވަސްކުރުމަށްޓަކައި، އެއްފަހަރާ 46،000 ކިއުބިކް މީޓަރުގެ ވެލި ނެގުމުގެ ގާބިލުކަން ލިބިފައިވާ، ދުނިޔޭގެ އެންމެ ބިޔަ އެއް ޑްރެޖަރު ކަމަށްވާ ‘ކްރިސްޓޯބަލް ކޮލޯން’ އަންނަނީ އެ މަޝްރޫއުގައި ބޭނުންކުރަމުންނެވެ.