ހުޅުމާލޭގައި ދިރިއުޅޭ ރައްޔިތުންނަށް ނަމާދުކުރުމަށް ދިމާވެފައިވާ ޖާގައިގެ ދަތިކަމަށް ހައްލެއް ހޯދައިދިނުމުގެ ގޮތުން، ކުރިއަށް އޮތް ބަރަކާތްތެރި ރަމަޟާން މަހުގެ ކުރިން އެ އަވަށުގައި އަލަށް އިމާރާތްކުރާ ތިން މިސްކިތެއް ހުޅުވުމުގެ މަސައްކަތް ބާރު ސްޕީޑުގައި ކުރިއަށްދާކަން އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ހާމަކުރައްވައިފިއެވެ.
އަމިއްލަ ފަރާތްތަކުގެ ދީލަތި އެހީތެރިކަމާ އެކު ބިނާކުރަމުންދާ މި އިސްލާމީ ބިނާތަކުގެ ތެރެއިން، “މަސްޖިދު މާޔާ”ގެ އަމަލީ މަސައްކަތްތައް ނިމުމަކާ ގާތްވެފައިވާއިރު، އަންނަ ނޮވެންބަރު މަހުގެ ތެރޭގައި އެ މިސްކިތް ރަސްމީކޮށް ހުޅުވުމަށް އަމާޒު ހިފާފައިވާކަމަށް ވަޒީރު ފާހަގަކުރެއްވިއެވެ. މީގެ އިތުރުން، ހުޅުމާލޭގެ ފުރަތަމަ ފިޔަވަހީގައި ހަދަމުންދާ “މަސްޖިދު ޢާއިޝާ (ރަޟިޔަﷲ ޢަންހާ)”އާއި ދެވަނަ ފިޔަވަހީގެ އަމާން އުދަރެސް ފްލެޓްތައް ހިމެނޭ ސަރަހައްދުގައި އިމާރާތްކުރާ މިސްކިތް ވެސް ރޯދަމަހުގެ ކުރިން ހިދުމަތަށް ނެރެވޭނެކަމުގެ ޔަގީންކަން ޑރ. ޝަހީމް ވަނީ ދެއްވާފައެވެ.
މިސްކިތްތަކާއި ދީނީ މަރުކަޒުތައް ބިނާކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ހާއްސަ އިސްކަމެއް ދީގެން ކުރިއަށްގެންދާ ސިޔާސަތެއްކަން ފާހަގަކުރައްވައި، ވަޒީރު މީގެ ކުރިން ވިދާޅުވެފައި ވަނީ ކުރިއަށް އޮތް ރޯދަމަހާ ދިމާކޮށް މުޅި ރާއްޖެއިން ޖުމްލަ ސާދަވަރަކަށް މިސްކިތް އާންމުންނަށް ހުޅުވައިލެވޭނެ ކަމަށެވެ.
ދުވަހެއް ދުވަހަކަށް އާބާދީ ބޮޑުވަމުން އަންނަ ހުޅުމާލޭގައި، ހާއްސަކޮށް ރަމަޟާން މަހުގެ ތެރޭގައި މިސްކިތްތައް ފުރިބާރުވެގެންދާ މައްސަލައަށް މި އާ ތިން މިސްކިތުގެ ސަބަބުން ވަރަށް ބޮޑު ލުއިފަސޭހަކަމެއް ލިބި، ރައްޔިތުންނަށް ފަސޭހަކަމާ އެކު އަޅުކަންކުރުމުގެ ފުރުސަތު ފަހިވެގެންދާނެއެވެ.