ދިވެހި ރައްޔިތުންގެ ކަންބޮޑުވުންތަކާއި ހިޔާލުތައް ގާތުން އެއްސެވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފައްޓަވާފައިވާ “ރައްޔިތުންގެ އަޑު” ޕްރޮގްރާމްގެ ދަށުން، އިތުރު އަށް ދާއިރާއެއްގެ ރައްޔިތުންނަށް އެމަނިކުފާނާ ބައްދަލުކުރުމަށް ނަން ހުށަހެޅުމުގެ ފުރުސަތު ރައީސް އޮފީހުން މިއަދު ހުޅުވާލައިފިއެވެ.
ރައީސް އޮފީހުން އާންމުކޮށްފައިވާ މައުލޫމާތުތަކަށް ބަލާއިރު، މި ފަހަރުގެ ބައްދަލުވުންތަކަށް ހާއްސަކޮށްފައި ވަނީ ހެންވޭރު އުތުރު ދާއިރާ، މިލަންދޫ ދާއިރާ، ވެލިދޫ ދާއިރާ، ތުޅާދޫ ދާއިރާ، ފެލިދޫ ދާއިރާ، މުލަކު ދާއިރާ، ނިލަންދޫ ދާއިރާ އަދި ގުރައިދޫ ދާއިރާއެވެ. މި ދާއިރާތަކަށް ނިސްބަތްވާ ފަރާތްތަކުން ރައީސާ ބައްދަލުކުރަން ބޭނުންވާނަމަ، އެކަމަށް ކަނޑައަޅާފައިވާ ހާއްސަ އޮންލައިން ޕޯޓަލް މެދުވެރިކޮށް އަންނަ ހޯމަ ދުވަހުގެ ރޭގަނޑު 12:00ގެ ކުރިން ރަޖިސްޓްރީވުމަށް ވަނީ އަންގާފައެވެ.
އާންމު ރައްޔިތުންނާ އެއްވެސް ހުރަހެއް ނެތި ސީދާ ރައީސުލްޖުމްހޫރިއްޔާއާ ބައްދަލުކުރެވޭނެ އިންތިޒާމު ހަމަޖެއްސުމުގެ މަގުސަދުގައި ފެށި މި ސިލްސިލާއަކީ ރައްޔިތުންނާ ވީހާ ވެސް ގާތުން މަސައްކަތްކުރެއްވުމަށް ސަރުކާރުން ގެންގުޅޭ ސިޔާސަތުގެ ދަށުން ފުޅާ ދާއިރާއެއްގައި ކުރިއަށްގެންދާ ހަރަކާތެކެވެ. މީގެ އިތުރުން، މި ބައްދަލުވުންތަކުގައި ބައިވެރިވުމާ ގުޅޭގޮތުން އަމަލުކުރަންޖެހޭ މައިގަނޑު އުސޫލުތައް ރައީސް އޮފީހުގެ ރަސްމީ ވެބްސައިޓުގައި ޝާއިއުކޮށްފައިވާނެކަމަށް ވެސް އެ އޮފީހުން ވަނީ ބުނެފައެވެ.