ރާއްޖޭގެ އެކި ރަށްރަށުގައި އުފެދޭ ކުނި ރައްކާތެރިކަމާ އެކު އެއްތަނުން އަނެއް ތަނަށް ގެންދިއުމަށްޓަކައި، ކަނޑުދަތުރުފަތުރަށް ޚާއްޞަކޮށްގެން ބަނދެފައިވާ ތިން އުޅަނދެއް ވަރަށް އަވަހަށް ބޭނުންކުރަން ފަށާނެކަމަށް މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވުޒާރާއިން ހާމަކުރައްވައިފިއެވެ.
އެ ވުޒާރާގެ ވޭސްޓް މެނޭޖްމަންޓް އެންޑް ޕޮލިއުޝަން ކޮންޓްރޯލް ޑިޕާޓްމަންޓުގެ ޑިރެކްޓަރ ޖެނެރަލް އަޙްމަދު މުރުތަޟާ މަޢުލޫމާތު ދެއްވި ގޮތުގައި، ކުނި އުފުލަން ގެންނަ އުޅަނދުތަކުގެ ތެރެއިން އެއް ބޯޓު އިންޑިއާގައި މިހާރު ވަނީ ބަނދެ ނިމިފައެވެ. އަދި އެ އުޅަނދު ރާއްޖެ ގެނައުމުގެ ކުރިން ހަދަންޖެހޭ އެންމެ ފަހުގެ އިންސްޕެކްޝަންތައް ފުރިހަމަކުރުމަށްޓަކައި ދިވެހި ޓީމެއް މި ހަފުތާގައި ފުރާނެއެވެ. މީގެ އިތުރުން ރާއްޖޭގައި ބަންނަމުންދާ ދެ ލޭންޑިންގ ކްރާފްޓް އަންނަ އަހަރުގެ ޖުލައި މަހާ ހަމައަށް ނިންމާލެވި، ރަސްމީކޮށް ޚިދުމަތަށް ނެރެވޭނެކަމުގެ ޔަޤީންކަން އޭނާ ދެއްވިއެވެ.
ރާއްޖޭގެ ކުނީގެ މައްސަލައަށް ދާއިމީ އަދި ދެމެހެއްޓެނިވި ފަރުވާއެއް ހޯދުމުގެ ގޮތުން ސަރުކާރުން އަންނަނީ ވަށާޖެހޭ ނިޒާމެއް ޤާއިމުކުރުމުގެ ބޮޑު މަޝްރޫޢެއް ހިންގަމުންނެވެ. މި މަސައްކަތުގެ ދަށުން، ކުނިން ހަކަތަ އުފެއްދުމާއި، ސަރަޙައްދީ ފެންވަރުގައި ކުނި މެނޭޖްކުރާނެ މަރުކަޒުތައް ހެދުމުގެ އިތުރުން، ރައްކާތެރި ގޮތުގައި ކުނި ނައްތާލުމުގެ އިންތިޒާމުތައް ދަނީ ހަމަޖައްސަމުންނެވެ. މީގެ މައިގަނޑު އަމާޒަކީ “ސާކިއުލަރ އިކޮނޮމީ” އަދި “ގްރީން އިކޮނޮމީ” ގެ އުސޫލުތަކުގެ ތެރެއިން ތިމާވެށްޓަށާއި ޢާންމު ޞިއްޙަތަށް ލިބޭ ގެއްލުންތައް ކުޑަކުރުމެވެ.
ޤާނޫނީ އޮނިގަނޑަށް ބަލާއިރު، ކުނި މެނޭޖްކުރުމަކީ މިހާރު ރަސްމީކޮށް ޔުޓިލިޓީ ޚިދުމަތެއްގެ ގޮތުގައި ވަނީ ކަނޑައަޅާފައެވެ. މިކަން އިތުރަށް ހަރުދަނާކުރުމަށްޓަކައި ބޭނުންވާ މުހިންމު ޤަވާއިދުތައް އެކުލަވާލުމުގެ މަސައްކަތް ނިމިފައިވާއިރު، އޭގެ ތެރޭގައި ކުނި މެނޭޖްކުރުމުގެ ޢާންމު ޤަވާއިދާއި، އެއްފަހަރު ބޭނުންކޮށްފައި އުކާލާ ޕްލާސްޓިކް ކޮންޓްރޯލްކުރުމުގެ ޤަވާއިދު ހިމެނެއެވެ. މި ޤަވާއިދުތައް ގެޒެޓްކުރުމުގެ އެންމެ ފަހުގެ މަރުޙަލާގެ މަސައްކަތްތައް ވުޒާރާއިން މިހާރު އަންނަނީ ކުރަމުންނެވެ.