ރަށެއްގައި ތިބޭ ފުލުހުންގެ އަދަދު މަދުވުމަކީ ހިދުމަތުގެ ފެންވަރު ދަށްވާން ޖެހޭ ސަބަބެއް ނޫން ކަމަށް ޕޮލިސް ކޮމިޝަނަރު (ސީޕީ)އަހުމަދު މުހައްމަދު ވިދާޅުވެއްޖެއެވެ.
އޭނާ އެފަދައިން ވިދާޅުވީ އދ. ކުނބުރުދޫ އާ ޕޮލިސް ސްޓޭޝަން ހުޅުވުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.
އެގޮތުން ރަށްރަށުގައި ރައްޔިތުންނަށް ޕްރޮފެޝަނަލް ހިދުމަތެއް ފޯރުކޮށްދިނުމުގައި އެންމެ ބޮޑު އިސްކަމެއް ދޭންޖެހެނީ، ފުލުހުންގެ ކޮންސެޕްޓަށް ފަރުމާކުރެވިފައިވާ އަދި އެކަށީގެންވާ ވަސީލަތްތައް ހުރި މަރުކަޒުތަކެއްގައި ތިބެގެން މަސައްކަތްކުރުމަށް ކަމަށް އޭނާ ވިދާޅުވިއެވެ. އަދި ފުލުހުން ނެތް ރަށްރަށުގައި ފުރަތަމަ ފުލުހުން ގާއިމުކުރުމަށްފަހު، މިހާރު ހިނގަމުންދަނީ އެ ރަށްރަށުގައި އަމިއްލަ މަރުކަޒުތައް ގާއިމުކޮށް ފުރިހަމަ ހިދުމަތެއް ދިނުމުގެ މަސައްކަތް ކަމަށް ވެސް ވިދާޅުވިއެވެ.
އަދި ކުނބުރުދޫގައި ގާއިމުވެ ތިބޭ ފުލުހުންނާ މުހާތަބުކުރައްވައި ސީޕީ ވިދާޅުވީ، ރަށެއްގައި ތިބޭ ފުލުހުންގެ އަދަދު މަދުވުމަކީ ރައްޔިތުންނަށް ދެވޭ ހިދުމަތުގެ ފެންވަރު ދަށްވާންޖެހޭ ސަބަބެއް ނޫން ކަމަށެވެ.
“މަދު ފުލުހުންކޮޅެއް ތިބެގެން ރަނގަޅު، އެފިޝަންޓް، އިފެކްޓިވް މަސައްކަތެއް ކުރެވުނީމާ، ގިނަ ބަޔަކު ތިބެގެން ރައްޔިތުން އުއްމީދު ކުރާ ވަރަށް އެ މަސައްކަތް ނުކުރެވުން، އެއަށްވުރެ ރަނގަޅުވާނެ މަދު ބަޔަކު ތިބެގެން ރައްޔިތުންނަށް ރަނގަޅު ހިދުމަތެއް ދިނުން. އެހެންވީމަ އަޅުގަނޑު އެދެނީ، ކިތަންމެ މަދުން ފުލުހުން ތިބުން އެއީ ސަބަބެއް ކަމަށް ނުބަލައި، އެ ތިބޭ ފުލުހުން ގާނޫނާއި ގަވާއިދާ އެއްގޮތަށް ރައްޔިތުންނާ ދޭތެރޭ އޮންނަންޖެހޭ ގާތް ގުޅުން ބާއްވައިގެން، އަޅުގަނޑުމެންނާ ހަވާލުކޮށްފައިވާ މަސްއޫލިއްޔަތު އޭގެ އެންމެ އެދެވޭ ގޮތުގައި އަދާކުރަމުން ރައްޔިތުންނާ ގުޅިގެން މި މަސައްކަތް ކުރުމަށް”ސީޕީ ވިދާޅުވިއެވެ.