ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ގޮނޑި ހުސްވުމާ ގުޅިގެން، އެ ދާއިރާއަށް އައު މެންބަރަކު އިންތިޚާބުކުރުމަށްޓަކައި މިއަދު ހެނދުނު އައްޑޫ ސިޓީ އަދި މާލޭގައި ބައި-އިލެކްޝަންގެ ވޯޓުލުމުގެ ކަންކަން ފަށައިފިއެވެ.
އިލެކްޝަންސް ކޮމިޝަނުން މަޢުލޫމާތު ދެއްވާފައިވާ ގޮތުގައި، މިއަދު ހެނދުނު 8:00 އިން ފެށިގެން ހަވީރު 4:00 އާ ހަމައަށް މި ވޯޓުލުން ކުރިއަށްދާނެއެވެ. ވެރިކަންކުރާ ޕީއެންސީގެ ފަރާތުން އަޙްމަދު ސަޢީދު އަދި އިދިކޮޅު އެމްޑީޕީގެ ފަރާތުން ޢަބްދުﷲ ޞާދިޤު ވާދަކުރައްވާ މި އިންތިޚާބުގައި، ވޯޓުލުމުގެ ޙައްޤު ލިބިފައިވާ 4،121 ރައްޔިތުން ތިބިކަމަށް އެ ކޮމިޝަނުން ހާމަކުރައްވައެވެ. މީގެ އިތުރުން، މި އިންތިޚާބަށް ޚާއްޞަކޮށްގެން 4،154 ވޯޓު ކަރުދާސް ވަނީ ޗާޕުކޮށްފައެވެ.
އިންތިޚާބުގެ ކަންކަން ފަސޭހަކަމާ އެކު ކުރިއަށް ގެންދިއުމަށް މާލެއާއި އައްޑޫ ސިޓީގައި ޖުމްލަ 7 ވޯޓު ފޮއްޓެއް ވަނީ ބަހައްޓާފައެވެ. އެގޮތުން، މާލޭގައި ވޯޓުލުން ކުރިއަށްދަނީ ދަރުމަވަންތަ ސްކޫލްގެ ދެކުނު އިމާރާތުގެ ލައިބްރަރީގައި ބަހައްޓާފައިވާ 2 ފޮށީގައެވެ. އައްޑޫ ސިޓީގައި ވޯޓުލުމަށް ހަމަޖެހިފައިވަނީ ހިތަދޫ ސްކޫލްގެ ހޯލާއި ކިލާސްރޫމްތަކުގައި ބަހައްޓާފައިވާ 5 ފޮށީގައެވެ.
ވޯޓުލާ މަރުކަޒުތަކުގެ ސަލާމަތީ ކަންކަން ކަށަވަރުކުރުމުގެ ގޮތުން، އެ ސަރަޙައްދަށް ވަދެވޭނީ ހަމައެކަނި ކާކުކަން އަންގައިދޭ ރަސްމީ ލިޔުމެއްގެ (އައިޑީ ކާޑު، ޕާސްޕޯޓް، ނުވަތަ ލައިސަންސް ކާޑު) އިތުރުން އާދައިގެ ނޫކުލައިގެ ގަލަމެއް ހިފައިގެންނެވެ. އަދި އަތްދަބަހާއި، ފައިލް ފަދަ ތަކެތި ވެއްދުމަކީ މަނާކަމަކަށް ވާއިރު، ފޯނާއި ކެމެރާ ފަދަ އަޑާއި މަންޒަރު ރެކޯޑުކުރެވޭ އެއްވެސް އާލާތެއް ވޯޓުލާ މަރުކަޒަށް ވެއްދުމަށް ވަނީ މަނާކުރެވިފައެވެ.
ހިތަދޫ އުތުރު ދާއިރާގެ ބައި-އިލެކްޝަން މި ބާއްވަން ޖެހުނީ، މި ހިނގާ 2024ވަނަ އަހަރު އެ ދާއިރާއަށް ހޮވިވަޑައިގަތް މުޙައްމަދު ސިނާންގެ މައްޗަށް ސާބިތު ދަރަންޏެއް އޮތްކަން ޔަޤީންވެ، އެ ފައިސާ ޙުކުމާ އެއްގޮތަށް ދައްކަމުން ނުދާތީއެވެ. މި މައްސަލައާ ގުޅިގެން ސުޕްރީމް ކޯޓުން ކުރި ޙުކުމާ އެކު އޭނާގެ ގޮނޑި ގެއްލުމަކީ މި އިންތިޚާބު އަލުން ބާއްވަންޖެހުނު މައިގަނޑު ސަބަބެވެ.