ޚިދުމަތުގެ ފެންވަރު ރަނގަޅުކުރުމުގެ މަޤުޞަދުގައި، ވެލާނާ އިންޓަނޭޝަނަލް އެއާޕޯޓް (ވީއައިއޭ)ގެ ޖެޓީ ސަރަޙައްދު ބޭނުންކުރާ އެންމެހާ ކަނޑުއުޅަނދުތަކުން، ޚާއްޞަ އޮންލައިން ޕޯޓަލްއެއް މެދުވެރިކޮށް ހުއްދަ ހޯދަންޖެހޭ އައު އުސޫލަކަށް އިއްޔެއިން ފެށިގެން އަމަލުކުރަން ފަށައިފިއެވެ.
މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)އިން މަޢުލޫމާތު ދެއްވާފައިވާ ގޮތުގައި، އަލަށް ތަޢާރަފުކުރެވުނު “ހާބަރ ޕޯޓަލް”ގެ ސަބަބުން އެއާޕޯޓުގެ ފަޅުތެރެއަށް ވަންނަ އުޅަނދުތަކުގެ މަޢުލޫމާތުތައް ޑިޖިޓަލް ނިޒާމެއްގެ ތެރެއިން ބެލެހެއްޓުމަށް މަގުފަހިވެގެންދާނެއެވެ. އަދި އޮޕަރޭޝަނަލް ހަރަކާތްތައް ގާތުން މޮނިޓަރކުރުމަށް މި ބަދަލާ އެކު ވަރަށް ބޮޑު ލުއިފަސޭހައެއް ލިބޭނެކަމަށް އެ ކުންފުނިން ފާހަގަކުރެއެވެ.
މި ނިޒާމު ތަންފީޒުކުރުމަށް ހަމަޖެހިފައި ވަނީ އެކި ފިޔަވަހިތަކަކަށް ބަހާލައިގެންނެވެ. އެގޮތުން، މިހާރު ފެށިގެން ކުރިއަށްދާ ފުރަތަމަ ފިޔަވަހީގެ ދަށުން، އުޅަނދުތައް ޕޯޓަލްގައި ރަޖިސްޓަރީކުރުމަށް ޚާއްޞަ ސަމާލުކަމެއް ދިނުމާ އެކު، ނިޒާމު ބޭނުންކުރާނެ ގޮތުގެ މަޢުލޫމާތު އުޅަނދުތަކުގެ ވެރިންނަށާއި ދުއްވާ ފަރާތްތަކަށް ފޯރުކޮށްދިނުމުގެ މަސައްކަތް ދަނީ ކުރަމުންނެވެ. މީގެ އިތުރުން، ރަޖިސްޓަރީވުމުގެ ކަންކަން ފަސޭހަކޮށްދިނުމަށް ޓަކައި، ފަޅުތެރޭގައި ހަރަކާތްތެރިވާ ފަރާތްތަކާ ސީދާ ބައްދަލުކޮށް އެހީތެރިކަން ފޯރުކޮށްދިނުމަށްވެސް ވަނީ ރޭވިފައެވެ.
އައު ގަވާއިދަށް އަހުލުވެރިވެ، ޕޯޓަލްގައި ރަޖިސްޓަރީވުމަށް އުޅަނދުތައް އޮޕަރޭޓުކުރާ ފަރާތްތަކަށް އެއް މަސްދުވަހުގެ ފުރުސަތެއް އެމްއޭސީއެލްއިން ވަނީ ދީފައެވެ. މި މުއްދަތު ހަމަވުމަށް ފަހު، އެއާޕޯޓުގެ ފަޅުތެރެއިން އެއްވެސް ޚިދުމަތެއް ލިބޭނީ، ޕޯޓަލް މެދުވެރިކޮށް އެޑްވާންސްކޮށް ހުއްދައަށް އެދިގެންކަމަށް އެ ކުންފުނިން ވަނީ އަންގާފައެވެ.