އަމީނީ މަގުގެ ހުޅަނގުކޮޅުގައި ހަލާކުވެފައި އޮތް ސަރަޙައްދުގައި އަލުން ތާރުއަޅައި މަރާމާތުކުރުމަށް ފަހު، އެމަގުގެ ފުރަތަމަ ދެ ސެގްމެންޓު އާއްމު ދަތުރުފަތުރަށް މިއަދު ހުޅުވާލާފައިވާކަން ބިނާރާއި ގެދޮރުވެރިކަމާ ޢުމްރާނީ ތަރައްޤީއާ ބެހޭ ވުޒާރާއިން ހާމަކުރައްވައިފިއެވެ.
ދައުލަތުގެ ކުންފުނި އެމްޓީސީސީއާ މިދިޔަ ޖޫން މަހުގެ 15ވަނަ ދުވަހު ޙަވާލުކުރި މި މަޝްރޫޢުގެ ދަށުން މިހާތަނަށް ނިންމާފައި ވަނީ ދިވެހިރާއްޖޭގެ އަޑުން ފެށިގެން ދަރުމަވަންތަ ހޮސްޕިޓަލާ ދެމެދު އޮތް ސަރަޙައްދާއި، ރާއްޖޭގެ އަޑު ކައިރީގައި އޮންނަ ހަތަރުއަނގޮޅި ކަންމައްޗެވެ. މިގޮތުން، މި ދެ ފިޔަވަހީގައި ހިމެނޭ ގާތްގަނޑަކަށް 3000 އަކަމީޓަރުގެ ސަރަޙައްދެއްގެ ބާ ތާރުގަނޑު ނަގައި، ސަބްގްރޭޑް އަދި ސަބްބޭސްގެ އިތުރުން އޭބީސީ ފަށަލައެއް އެޅުމަށް ފަހު ވަނީ އައު ތާރުގަނޑެއް އަޅައި ޒަމާނީ ފެންވަރަށް ތަރައްޤީކޮށްފައެވެ.
މީގެ އިތުރުން، އަންނަ އާދީއްތަ ދުވަހު މި މަޝްރޫޢުގެ ތިންވަނަ ސެގްމެންޓުގެ އަމަލީ މަސައްކަތް ފެށުމަށް ވަނީ ތައްޔާރުވެފައެވެ. އިއްޒުއްދީން މަގުން ފެށިގެން ކޯރުކެނޑި ހިނގުމާ ހަމައަށް ކުރިއަށްގެންދާ މި ފިޔަވަހީގެ މަސައްކަތް ފެށުމުގެ ގޮތުން، މިރޭ ދަންވަރު 12:00އިން ފެށިގެން އެ ހިސާބުގެ ޓްރެފިކަށް ބަދަލުގެނެސް، ޕާކުކޮށްފައިވާ އުޅަނދުތައް ނެގުމަށް ދިވެހި ފުލުހުންގެ ޚިދުމަތުން ވަނީ އަންގަވާފައެވެ. ހަތަރުވަނަ ސެގްމެންޓުގެ ގޮތުގައި ކޯރުކެނޑި ހިނގުމުން ފެށިގެން ޣިޔާސުއްދީން އިންޓަރނޭޝަނަލް ސްކޫލާ ހަމައަށް ވެސް ތާރުއަޅައި މަގުމަތީ ނިޝާންތައް ކުރެހުމަށް އެމްޓީސީސީން ވަނީ ރާވާފައެވެ.
އަމީނީ މަގުގެ މާފަންނާވީ ކޮޅަކީ ބަހާއި ބަރު އުޅަނދުފަހަރު ގިނަ ޢަދަދަކަށް ދަތުރުކުރާ މަގަކަށްވެފައި، އެ ސަރަޙައްދުގައި ބޮޑެތި ވަޅުގަނޑުތައް ހެދި ދުއްވާ އެއްޗެއްސަށް ބޮޑެތި ދަތިތަކަކާ ކުރިމަތިވުމުގެ ސަބަބުން މިއީ ސަރުކާރުން އިސްނަންގަވައިގެން ފެށި މަރާމާތެކެވެ.
މާލޭގެ މަގުތައް ޒަމާނީ ފެންވަރަށް ތަރައްޤީކުރުމުގެ ބޮޑު މަޝްރޫޢުގެ ތެރެއިން، މާލޭގެ ހުޅަނގުކޮޅު ބޭރުމަގު ހެދުމަށް ވެސްޓް ޕާކް ސަރަޙައްދުގައި ފެންހިންދާ ނިޒާމު ޤާއިމުކުރުމުގެ މަސައްކަތް މިހާރު ދަނީ ކުރިއަށެވެ. އަދި ހެންވޭރު ފެރީ ޓަރމިނަލުން ފެށިގެން ނޯތު ހާބަރާ ހަމައަށް ބޮޑުތަކުރުފާނު މަގު ތަރައްޤީކޮށް ނިމުމާ އެކު ދަތުރުފަތުރަށް ވަނީ ވަރަށް ބޮޑު ލުއިފަސޭހައެއް ލިބިގެންގޮސްފައެވެ.