ރައްޔިތުންގެ ސުވާލުތަކަށް ޖަވާބުދެއްވުމަށާއި ސަރުކާރުގެ ސިޔާސަތުތައް ހާމަކުރުމަށް ރައީސުލްޖުމްހޫރިއްޔާގެ އޮފީހާއި ދައުލަތުގެ މީޑިއާ ގުޅިގެން ކުރިއަށްގެންދާ “އަހާ” ފޯރަމްގެ އައު ބައްދަލުވުމެއް، ދައުލަތުގެ އިސް ތިން ވަޒީރަކާ އެކު އަންނަ އާދީއްތަ ދުވަހުގެ ރޭ ބޭއްވުމަށް ނިންމައިފިއެވެ.
އަންނަ އާދީއްތަ ދުވަހުގެ ރޭ 21:00ގައި ފަށާ މި ބައްދަލުވުމުގައި އާންމުންގެ ސުވާލުތަކަށް ޖަވާބުދެއްވުމަށް ހަމަޖެހިފައި ވަނީ ދިފާއީ އަދި ވަތަނީ ޚިދުމަތާ ބެހޭ ވަޒީރު ހަސަން ރަޝީދާއި، އިޤްތިޞާދީ ތަރައްޤީއާއި ދަތުރުފަތުރާއި ވިޔަފާރިއާ ބެހޭ ވަޒީރު މުޙައްމަދު ސަޢީދުގެ އިތުރުން ބަންޑާރަނައިބު އަލްއުސްތާޛު އަޙްމަދު އުޝާމްއެވެ. މިއީ ސަރުކާރުން ހިންގާ މަޝްރޫޢުތަކުގެ އެންމެ ފަހުގެ މަޢުލޫމާތުތައް ފޯރުކޮށްދީ، ސަރުކާރާއި ރައްޔިތުންނާ ދެމެދު އޮންނަ ގުޅުން ބަދަހިކުރުމަށް ބާއްވާ ސިލްސިލާ ހަރަކާތެކެވެ.
ދެ ގަޑިއިރުގެ މުއްދަތަކަށް ކުރިއަށްގެންދާ މި ޕްރޮގްރާމުގައި ސީދާކޮށް ބައިވެރިވެވަޑައިގެން ވަޒީރުންނާ ސުވާލުކުރުމުގެ ފުރުޞަތު ޕީއެސްއެމްއިން މިހާރު ވަނީ އާންމުންނަށް ހުޅުވާލާފައެވެ. އަދި ހަމައެހެންމެ، ޕީއެސްއެމްގެ ޚާއްޞަ އެޕްލިކޭޝަން މެދުވެރިކޮށް ވެސް ރައްޔިތުންނަށް އެބޭފުޅުންގެ ކަންބޮޑުވުންތަކާއި ސުވާލުތައް ފޮނުވޭނެ އިންތިޒާމު ވަނީ ހަމަޖައްސާފައެވެ.
މިއަހަރުގެ ޖަނަވަރީ މަހުގެ ތެރޭގައި ތަޢާރަފުކުރި މި ފޯރަމްގެ ގިނަ ބައްދަލުވުންތަކެއް މީގެ ކުރިން ވެސް ބާއްވާފައިވެއެވެ. އެގޮތުން، އެންމެ ފަހުން ބޭއްވި ފޯރަމް މިދިޔަ ހަފްތާގެ އާދީއްތަ ދުވަހުގެ ރޭ ކުރިއަށް ގެންގޮސްފައިވާއިރު، އެ ރޭގެ ބައްދަލުވުމުގައި މަސްވެރިކަމާ ބެހޭ ވަޒީރު އަޙްމަދު ޝިޔާމާއި، ދާޚިލީ ވަޒީރު ޢަލީ އިޙްސާން އަދި ކުޅިވަރާ ބެހޭ ވަޒީރު ޢަބްދުﷲ ރާފިޢު ވަނީ ރައްޔިތުންގެ ސުވާލުތަކަށް ޖަވާބުދެއްވާފައެވެ.