ދަތުގެ ފަރުވާ ދެއްވުމުގައި މުޅި ރާއްޖެއަށް މަގުބޫލުވި ހިދުމަތްތެރިޔާ އަބްދުﷲ ސަޢީދު (ދަތްޖަހާ ސަޢީދު) އަވަހާރަވުމާ ގުޅިގެން ރައީސް ޑރ. މުއިއްޒު ތައުޒިޔާ ވިދާޅުވެއްޖެ އެވެ.
އުމުރުފުޅުން 89 އަހަރުގައި ސައީދު އަވަހާރަވީ މިއަދު އެވެ. އަދި މިއަދު މެންދުރު ނަމާދަށް ފަހު އޭނާ ވަނީ އާސަހަރާގައި ވަޅުލައިފަ އެވެ.
ސައީދު އަވަހާރަވުމާ ގުޅިގެން ރައީސް މުއިއްޒު އެކްސްގައި ވަނީ އޭނާއަށް ސުވަރުގޭގެ ދާއިމީ ނިއުމަތް ދެއްވުން އެދިވަޑައިގަންނަވާ ދުއާ ދަންނަވައިފަ އެވެ.
ރައީސް ވިދާޅުވީ ސައީދު އަވަހާރަވުމަކީ ގައުމަށް ލިބުނު ވަރަށް ބޮޑު ހިތާމައެއް ކަމަށެވެ، އަދި އޭނާ އަކީ ދިގު މުއްދަތެއްގައި ސިއްހީ ހިދުމަތުގައި އުޅުއްވުމުގެ އިތުރުން، ދިވެހި މަސައްކަތްތެރިކަމުގެ އެކި ފަންނުތަކުގައިވެސް ބޮޑެތި ކާމިޔާބީތަކެއް ހާސިލު ކުރައްވައިފައިވާ ހުނަރުވެރިއެއްކަން ވެސް ރައީސް ފާހަގަކުރެއްވި އެވެ.
ރާއްޖެއަށް ދަތުގެ ފަރުވާ ތައާރަފުކޮށްދެއްވި ބޭފުޅުންނަށް އެރުވި ހާއްސަ އެވޯޑެއް ވެސް ސައީދުއަށް ވަނީ އަރުވައިފަ އެވެ.