ޔޫއޭއީގެ މަޝްހޫރު އެއަރލައިން ކަމަށްވާ އިއްތިހާދު އެއަރވޭސް އާއި ރާއްޖޭގެ ޤައުމީ އެއަރލައިން، މޯލްޑިވިއަން ގުޅިގެން ދަތުރުވެރިންނަށް އިތުރު ލުއިފަސޭހަތަކެއް ފޯރުކޮށްދިނުމުގެ މަޤްޞަދުގައި، އެރޭބިއަން ޓްރެވަލް މާކެޓްގެ ތެރެއިން މުހިންމު ފަހުމުނާމާއެއްގައި ސޮއިކޮށްފިއެވެ.
މި އައު ގުޅުމުގެ ސަބަބުން، އިއްތިހާދު ގެސްޓް ލޯޔަލްޓީ ޕްރޮގްރާމްގައި ބައިވެރިވާ ފަރާތްތަކަށް، އެމީހުންނަށް ލިބިފައިވާ ‘މައިލްސް’ ބޭނުންކޮށްގެން މޯލްޑިވިއަންގެ އެތެރޭގެ އުދުހުންތަކުގައި ރާއްޖޭގެ އެކި ކަންކޮޅުތަކަށް ދަތުރުކުރުމުގެ ފުރުޞަތު ހުޅުވިގެންދާނެއެވެ.
މި ފިޔަވަޅަކީ ރާއްޖެ އަންނަ ފަތުރުވެރިން މާލެ ސަރަޙައްދުން ބޭރަށް، އަތޮޅުތެރޭގެ ރަށްތަކަށް ޒިޔާރަތްކުރުމަށް މަގުފަހިކޮށްދޭނެ ވަރަށް ބޮޑު ކުރިއެރުމެއްކަމަށް ދެ ކުންފުނިން ވެސް ވަނީ ފާހަގަކޮށްފައެވެ. އަދި މީގެ ސަބަބުން ރާއްޖޭގެ ފަތުރުވެރިކަމުގެ ސިނާޢަތަށް އޭގެ އެންމެ ހެޔޮ ބަދަލު އައިސް، އަތޮޅުތެރޭގެ ރަށްރަށަށް ދާ ފަތުރުވެރިންގެ ޢަދަދު އެތައް ގުނައަކުން އިތުރުވެގެންދާނެ ކަމަށް މޯލްޑިވިއަންއިން މަޢުލޫމާތުދެއެވެ.