ރާއްޖެއަށް މިހާރު ކުރަމުންދާ ހުޅަނގު މޫސުމުގެ ވިއްސާރަ ކުރިއަށް އޮތް ބުދަ ދުވަހުގެ ނިޔަލަށް ދެމިގެންދާނެކަމަށް ލަފާކޮށް، ގަދަވައިގެ ސަބަބުންނާއި ފެންބޮޑުވުމުގެ ހާދިސާތަކުން ރައްކާތެރިވުމަށް މޫސުމާ ބެހޭ ޤައުމީ އިދާރާއިން އާންމުކޮށް އަންގައި އިންޒާރު ދީފިއެވެ.
މޫސުން ގޯސްވާނެކަމަށް ބަލައި މެޓް އޮފީހުން ވަނީ ބ އަތޮޅުން ފެށިގެން ލ އަތޮޅާ ދެމެދުގެ ސަރަހައްދުތަކަށް މިއަދު މެންދުރު 14:00 އާ ހަމައަށް ހުދު ސަމާލު ނެރެފައެވެ. އަދި އޭގެ ކުރިން މިއަދު ހެނދުނު 09:30ގެ ނިޔަލަށް މުޅި ރާއްޖެއަށް ވެސް ވަނީ އެލާޓް ނެރެފައެވެ. އެ އިދާރާއިން މައުލޫމާތު ދޭގޮތުގައި، މި ސަރަހައްދުތަކަށް ގަޑިއަކު 19 މޭލާއި 24 މޭލާ ދެމެދުގެ ބާރުމިނެއްގައި ވައިޖެހޭނެއެވެ. އަދި ވިލާގަނޑުގައި ގަޑިއަކު 40 މޭލަށް ވައިގަދަވެ، ކަނޑުތައް ގަދަވުމާއެކު ރާޅުގެ އުސްމިން 4 ފޫޓާއި 7 ފޫޓާ ދެމެދުގެ މިންވަރަކަށް އުފުލޭނެކަމަށް ވަނީ ލަފާކޮށްފައެވެ.
ފާއިތުވި ބުރާސްފަތި ދުވަހުން ފެށިގެން މޫސުން ގޯސްވެފައިވާއިރު، މެދުކެނޑުމެއްނެތި ބޯކޮށް ވާރޭވެހުމުގެ ސަބަބުން ރާއްޖޭގެ އެކި ހިސާބުތަކުގައި ވަނީ ފެންބޮޑުވުމުގެ ހިތާމަވެރި ހާދިސާތައް ކުރިމަތިވެފައެވެ. އެންމެ ބޮޑު ގެއްލުމެއް ލިބުނު އެއް ރަށެއްގެ ގޮތުގައި ފާހަގަކުރެވޭ އައްޑޫ ސިޓީ ފޭދޫގައި އެކަނި ވެސް ހަތްދިހައަށްވުރެ ގިނަ ގެއަކަށް ފެންވަދެ، މުދަލަށާއި ގެދޮރަށް ވަނީ އެކިވަރުގެ ގެއްލުންތަކާ ކުރިމަތިލާންޖެހިފައެވެ.
މިއަންނަ ބުދަ ދުވަހާ ހަމައަށް މި ނުރައްކާތެރި މޫސުން ދެމިއޮންނާނެކަމަށް ބެލެވޭތީ، ކަނޑުދަތުރުކުރާ ފަރާތްތަކުންނާއި އާންމު ރައްޔިތުން މޫސުމަށް ހާއްސަ ސަމާލުކަމެއް ދިނުމަށް ކަމާބެހޭ އިދާރާތަކުން ވަރަށް ބޮޑަށް އެދެއެވެ. ހާއްސަކޮށް، ގެދޮރަށް ފެން ނުވަންނާނެހެން ރައްކާތެރިކަމުގެ ފިޔަވަޅުތައް އަވަހަށް އެޅުމަށް ވަނީ އިރުޝާދު ދެއްވާފައެވެ.