ޢަރަބިއްޔާގެ އައު ޢިމާރާތް ޑިސެންބަރުގައި ނިންމައި އަންނަ ދިރާސީ އަހަރު ކިޔަވައިދޭން ފެށޭނެކަމަށް ތަޢުލީމާއި މަތީ ތަޢުލީމާ ބެހޭ ވަޒީރު ޑރ. އިސްމާޢިލް ޝަފީޢު ވިދާޅުވެއްޖެއެވެ.
ދައުލަތުގެ މީޑިއާއަށް މަޢުލޫމާތު ދެއްވަމުން ވަޒީރު ފާހަގަކުރެއްވި ގޮތުގައި، މިހާރު ވެސް އެ މަސައްކަތުގެ ހަތްދިހަ އިންސައްތަ ވަނީ ފުރިހަމަވެފައެވެ. އަދި އަންނަ ދިރާސީ އަހަރުގެ ކިޔެވުން ފެށޭއިރު، އައު ޢިމާރާތުގައި ދަރިވަރުންނަށް އުނގަންނައިދިނުމުގެ ކަންކަން ފެށިގެންދާނެކަމުގެ ޔަޤީންކަން އެމަނިކުފާނު ދެއްވިއެވެ. ރައީސްގެ މި ޒިޔާރަތުގައި، އެ ސްކޫލުގެ ބައެއް ދަރިވަރުންނާ ބައްދަލުކުރައްވައި، އެކުދިންގެ ޝުޢޫރުތައް އައްސަވައި ސުވާލުތަކަށް ޖަވާބުދެއްވިއެވެ.
ދިހަ ބުރިއަށް ނަގާ މި ޒަމާނީ އިމާރާތުގައި 42 ކިލާސްރޫމާއި، ބޮޑު މަލްޓިޕާޕަސް ހޯލެއްގެ އިތުރުން ހަތަރު ލިފްޓު ހުންނާނެއެވެ. ފާހަގަކޮށްލެވޭ އަނެއް ކަމަކީ، މިއީ ރާއްޖޭގައި ބިމުގެ އަޑީގައި ޕާކިންގ ހެދޭ ފުރަތަމަ ސްކޫލަށް ވުމެވެ. މިގޮތުން 200 އަށްވުރެ ގިނަ ސައިކަލު ޕާކުކުރެވޭނެ ޖާގަ ހިމެނޭހެން ބިމުއަޑީގެ މަސައްކަތްތައް މިހާރު ވަނީ އެއްކޮށް ނިމިފައެވެ.
މިދިޔަ އަހަރުގެ ނޮވެންބަރު މަހު ބިންގާ އެޅި މި ސްކޫލް ބިނާކުރުމުގެ މަސައްކަތް ޙަވާލުކޮށްފައި ވަނީ އާރުސީސީއާއެވެ. މިއީ ކުރީގެ ކޮންޓްރެކްޓަރަށް ވުރެ 83 މިލިއަން ރުފިޔާގެ އަގުހެޔޮ ބިޑެކެވެ. ޑރ. ޝަފީޢު ވިދާޅުވި ގޮތުގައި އިމާރާތުގެ ތިރީ ތިން ފަންގިފިލާގެ ރޭނުމުގެ ބައި އެއްކޮށް ނިމި، މިހާރު ކުރިއަށްދަނީ ކުލަލުމާއި އެންމެ ފަހުގެ ފިނިޝިންގ މަސައްކަތްތަކެވެ.
މިހާރު ދެ ދަންފަޅިއަށް ކިޔަވައިދެމުން އަންނަ ޢަރަބިއްޔާ ސްކޫލް، އައު އިމާރާތާއެކު އެއް ދަންފަޅިއަށް ބަދަލުކުރުމަކީ ސަރުކާރުގެ އަމާޒެކެވެ. އެހެންނަމަވެސް، ސްކޫލަށް އަލަށް ވަންނަ ކުދިންގެ ޢަދަދަށް ރިޢާޔަތްކުރުމަށް ފަހު، މިކަމާ ގުޅޭގޮތުން އެންމެ ފަހުގެ ނިންމުމެއް ނިންމާނީ އަންނަ ނޮވެންބަރު މަހުކަމަށް ތަޢުލީމީ ވުޒާރާއިން މަޢުލޫމާތުދެއެވެ.
ޢަރަބިއްޔާގެ ދަރިވަރުންނަށް އައު އިމާރާތެއްގެ މުހިންމުކަން ބޮޑުވީ، އެ ކުދިން ކުރިން ކިޔަވަމުންދިޔަ އިމާރާތުގައި ރެނދުލައި ނުރައްކާތެރި ޙާލަތަކަށް ދިއުމާ ގުޅިގެންނެވެ. އޭގެ ފަހުން ފޮރިން މިނިސްޓްރީގެ ކުރީގެ އިމާރާތުގައި ވެސް ކިޔަވައިދިނުމަށް ފަހު، މިހާރު އެކުދިން ތަޢުލީމު ހާސިލުކުރަމުންދަނީ ކުރީގެ ދަރުމަވަންތަ ސްކޫލުގައެވެ. ކުރީގެ ސަރުކާރުން ބައު ޖަމާލުއްދީން ބިމުގައި މި ސްކޫލް އަޅަން ނިންމި ނަމަވެސް، ޓްރެފިކް ތޮއްޖެހުމާއި ޖާގައިގެ ދަތިކަމަށް ޙައްލެއް ހޯދުމުގެ ގޮތުން މިހާރުގެ ސަރުކާރުން ވަނީ މި މަޝްރޫޢު ޣިޔާޘުއްދީން ސްކޫލް ފަހަތުގައި އޮންނަ 381 ނަންބަރު ކޮށްޓަށް ބަދަލުކޮށްފައެވެ.