ޕީޕަލްސް ނޭޝަނަލް ކޮންގްރެސް (ޕީއެންސީ) އަކީ އެތެރޭގެ ޑިމޮކްރަސީ ހަރުދަނާވެފައިވާ ނަމޫނާ ޕާޓީއަކަށް ހެއްދެވުމަށް މަސައްކަތްޕުޅު ކުރައްވަމުން ގެންދަވާކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ދައުލަތުގެ މީޑިއާ، ޕީއެސްއެމްގެ “ނޭޝަން ޗެޓް” ޕޮޑްކާސްޓުގައި ވާހަކަފުޅުދައްކަވަމުން އެމަނިކުފާނު ފާހަގަކުރެއްވި ގޮތުގައި، މިދިޔަ ޖުލައި މަހުގެ 11ވަނަ ދުވަހު ބޭއްވުނު ޕީއެންސީގެ އެތެރޭގެ އިންތިޚާބަކީ އެ ޕާޓީގެ ސިޔާސީ ހަރަކާތްތަކުގެ މައިގަނޑު އަސާސް ބިނާކުރުމަށް އެޅުނު ވަރަށް މުހިންމު ފިޔަވަޅެކެވެ. މީގެ އިތުރުން، މިދިޔަ އަހަރުގެ ނޮވެމްބަރު މަހުގެ 17ވަނަ ދުވަހު މި ސަރުކާރު ވެރިކަމާ ހަވާލުވިއިރު ޕާޓީގެ ދަފްތަރުގައި ތިބީ އެންމެ ތިންހާހެއްހާ މެމްބަރުންކަމަށް ވިޔަސް، މިއަދު އެ އަދަދު ހަތްދިހަ ހާހާ ގާތްކުރާކަމީ ޕާޓީއަށް ލިބުނު ވަރަށް ބޮޑު ކުރިއެރުމެއްކަން ރައީސް ފާހަގަކުރެއްވިއެވެ.
ދާދި ފަހުން ނިމިދިޔަ އިންތިޚާބުން ޕާޓީގެ އެކި ގުނަވަންތައް ތަމްސީލުކުރާނެ ބޭފުޅުން އައްޔަންކުރެވިފައިވާއިރު، ދެން އެންމެ އަވަހަށް އޮތީ އަންނަ ސެޕްޓެމްބަރު މަހު ބާއްވާ ޕާޓީގެ ކޮންގްރެސް ނުވަތަ މަތީ މަޖިލީހެވެ. ރައީސް ވިދާޅުވީ، ޕީއެންސީ ފަރުމާކުރެވެމުންދަނީ ޒުވާނުންނާއި އަންހެނުންގެ ބައިވެރިވުން ވަރަށް ބޮޑަށް ފުޅާކުރެވި، ޑިމޮކްރެޓިކް އުސޫލުތަކުގެ މަތިން ރައްޔިތުންނަށް ޚިދުމަތްކުރުމަށް ތައްޔާރުވެފައިވާ މުއައްސަސާއެއްގެ ގޮތުގައި ކަމަށެވެ. އަދި އެހެން ސިޔާސީ ޕާޓީތަކަށް ވެސް މިކަމުގައި ލީޑަރޝިޕް ދައްކަވައި، ނަމޫނާ ބަޔަކަށް ވުމަށް ބޭނުންފުޅުވާކަމަށް އެމަނިކުފާނު ވިދާޅުވިއެވެ.
ސެޕްޓެމްބަރު މަހުގެ 15އިން 18އަށް ކުރިއަށްގެންދިޔުމަށް ހަމަޖެހިފައިވާ މަތީ މަޖިލީހުގެ ބައްދަލުވުމަކީ، ޕާޓީގެ އެތެރޭގެ ޑިމޮކްރަސީގެ ފުރިހަމަކަން ވަރަށް ރަނގަޅަށް ހާމަވެގެންދާނެ ކާމިޔާބު ހަރަކާތަކަށް ވާނެކަމުގެ ޔަގީންކަން ރައީސް މުއިއްޒު ވަނީ ސަޕޯޓަރުންނަށް ދެއްވާފައެވެ.
އިލެކްޝަންސް ކޮމިޝަނުގެ އެންމެ ފަހުގެ ތަފާސްހިސާބުތަކަށް ބަލާއިރު، 67,579 މެމްބަރުންނާ އެކު ޕީއެންސީއަކީ މިވަގުތު ދިވެހިރާއްޖޭގައި އޮތް އެންމެ އާބާދީ ބޮޑު ސިޔާސީ ޕާޓީއެވެ.