ފަރުޟު ޙައްޖުގެ އަޅުކަން އަދާކުރުމަށްޓަކައި ޕެންޝަން ފަންޑުން ފައިސާ ދައްކައިގެން، ޙައްޖު ކިޔުއިން ކުރިއާލައި ޖާގަ ކަށަވަރުކުރެވޭނެ އައު ނިޒާމެއް މިއަހަރު ތަޢާރަފުކޮށްފިއެވެ.
ދިވެހިރާއްޖޭގެ ޕެންޝަން ޤާނޫނަށް ގެނެވުނު އެންމެ ފަހުގެ އިސްލާޙާ އެކު، ޙައްޖަށް ދިއުމަށް ކަނޑައެޅިފައިވާ ޖުމްލަ އަގުގެ ވިހި އިންސައްތަ އެކަމަށް އެދޭ ފަރާތަކުން އަމިއްލަ އަތުން ދެއްކުމުން، ބާކީ އިން އައްޑިހަ އިންސައްތަ މޯލްޑިވްސް ރިޓަޔަރމަންޓް ސޭވިންގްސް އެކައުންޓް (އެމްއާރުޕީއެސް) މެދުވެރިކޮށް ހަމަޖައްސައިދެވޭނެއެވެ. މިގޮތަށް ފައިސާ ހަމަޖެއްސުމާ އެކު، މީހުން ޙައްޖަށް ގެންދިއުމަށް ދައުލަތުން ކަނޑައަޅާފައިވާ ކުންފުނީގެ ދަފުތަރުގައި އެމީހެއްގެ ނަން ހިމެނި، ކިޔުގެ ތަރުތީބުން ޖާގަ ރިޒާވްކުރެވިގެންދާނެއެވެ.
ޕެންޝަން ފަންޑުން ޙައްޖަށް ދިއުމުގެ މި ފުރުޞަތު ލިބިގެންދާނީ މީގެ ކުރިން ފަރުޟު ޙައްޖުގެ އަޅުކަން އަދާކޮށްފައި ނުވާ ފަރާތްތަކަށެވެ. އަދި މިކަމަށް އެދޭ މީހާގެ ޕެންޝަން އެކައުންޓުގައި މަދުވެގެން 336،000 ރުފިޔާ ހުރުން ލާޒިމުކުރެއެވެ. މީގެ ބޭނުމަކީ، ޕެންޝަން ލިބޭ އުމުރަށް ވާސިލުވާއިރު، މަހަކު 2،000 ރުފިޔާ ލިބޭނެވަރަށް އެކައުންޓުގައި ފައިސާ ބަހައްޓައިދިނުމެވެ. ހަމައެހެންމެ، ގެދޮރު ގަތުމަށް ޑައުންޕޭމަންޓުގެ ގޮތުގައި ޕެންޝަން ފައިސާ ނަގާފައިވާނަމަ، ޙައްޖަށް ދޫކުރާ މިންވަރު ކަނޑައަޅާނީ އެ ޢަދަދު އުނިކުރުމަށްފަހުގައެވެ.
މި އައު އުޞޫލުތަކާ ގުޅޭގޮތުން ޕެންޝަން އޮފީހުގެ ޗީފް ފައިނޭންޝަލް އޮފިސަރ އަޙްމަދު ސިނާން ވިދާޅުވެފައި ވަނީ، އަމިއްލަ މަސައްކަތްކުރާ މީހުންނަށް ވެސް ސްކީމްގައި ބައިވެރިވެވޭނެ މަގުފަހިކޮށްދީ، ފަންޑު ހިންގުން އިތުރަށް ހަރުދަނާކޮށްފައިވާ ކަމަށެވެ. އަދި މި ޤާނޫނުގެ ދަށުން އެކުލަވާލަންޖެހޭ ގަވާއިދުތަކާއި އިދާރީ އިންތިޒާމުތައް ކުރިއަށް އޮތް ތިން މަސްދުވަހުގެ ތެރޭގައި ނިންމުމުގެ މަސައްކަތް ހިނގަމުންދާކަމަށް ވެސް އޭނާ ފާހަގަކުރެއްވިއެވެ.
ޕެންޝަން ޢުމުރު ހަމަވެފައިވާ ފަރާތްތަކަށް ވެސް، އެމީހުންގެ ސޭވިންގްސް ބޭނުންކޮށްގެން ޙައްޖަށް ދިއުމަށް އެދި ހުށަހެޅުމުގެ ފުރުޞަތު މިހާރު އޮންނާނެއެވެ. އަދި މި ނިޒާމު ފުރިހަމައަށް ތަންފީޒުކުރުމަށްޓަކައި، ޙައްޖަށް މީހުން ގެންދާ ސަރުކާރުގެ ކުންފުންޏާއި ޕެންޝަން އޮފީހާ ދެމެދު ފައިސާ ދޫކުރުމުގެ އުޞޫލުތައް ބަޔާންކުރާ ޚާއްޞަ އެއްބަސްވުމެއްގައި ސޮއިކުރަންޖެހޭގޮތަށް ވަނީ ކަނޑައަޅާފައެވެ.